إزاي تكون عضو جامد -- كلمة عواجيز المنتدى :)

كح كح كح كح كح

حطنة الجلوكور من خوا يا هثام يا بنى وما تنصاش طكم الثنان مفاك

اه كدا تمام

السلام عليكم ورحمة الله وبركاته

ازيكم يا احلى اعضاء فى احلى منتدى

طبعا انتو عارفين المواصلات سهلة قد اية من الاوضة لحد الكمبيوتر وازاى مفيش اشارات ولا زحمة ولا باعة متجولين على الرصيف علشان كدا طبعا هتعذرونى على التأخير :pale:

أولا أحب أهنى إتش على الموضوع الجامد دا , ولكنك يا عم طلعتنا عواجيز قبل ما نلحق ندخل دنيا حتى ... ياله مش مشكلة متعوضة ... الشباب شباب القلب .. كح كح كح كح كح .

النصائح كتير والحمد لله علشان نفيد الاعضاء اللى لسة ما دخلوش دنيا ... قصدى منتدى .

1) أهم حاجة ان كل عضو يقرأ القوانين العامة لاستخدام المنتدى علشان يعرف ضوابط تنزيل المواضيع والمشاركات بشكل عام , وايضا القوانين الخاصة بكل قسم علشان ينزل موضوع لا تقوم الادارة لاحقا بحذفه لمخالفته .

2) تانى أهم حاجة اننا نمشى على الطريق اللى حددناه للمنتدى ورسالته الأساسية وهو أن المنتدى إسلامى وعلمى وان المفروض المواضيع والمشاركات المنشورة يكون لها اصل او خلفية من الهدفين دول , ودا لا يمنع طبعا المواضيع العامة والترفيهية علشان التواصل والتفاعل بين الأعضاء .

3) ثالث أهم حاجة ان العضو ياخد باله من زرار القميص ... قصدى البحث وهو ترتيبه الخامس وسط اخواته الموجودين بأعلى كل صفحة تحت هيدر المنتدى الاساسى , ودا علشان ما يبقاش فى تكرار للمواضيع , وبالتالى هتسهلوا علينا المهمة .

4) كمان من الحاجات المميزة جدا ان كل عضو ياخد باله من كلامه فى الرد على المواضيع , الحكماء بيقولوا : "الكلمة الطيبة تأسر القلوب" , فلازم كلنا ناخد بالنا من اسلوبنا فى الرد لاننا ممنك نجرح حد من غير ما نقصد .. كمان الكلمة الطيبة كالشجرة الطيبة أصلها ثابت وفرعها فى السماء مثل ما اخبرنا رسول الرحمة عليه الصلاة والسلام .

5) انا مع اتش كمان فى تقسيم المواضيع الطويلة لعدة مواضيع لان التطويل ممكن يخلى الاعضاء ما يكملوش الموضوع للنهاية ويطلعوا قبل ما يستفيدوا من الموضوع .

6) اما التنسيق فدا عامل اساسى جدا , لانك اكيد هتحتاج انك تشد انتباه القارئ لأجزاء معينة من الموضوع وكمان اختيار الالوان أهم من دا , لان كل لون بيبقى له تأثير معين داخل نفس القارئ علشان تحببه لشئ معين او تنفره من شئ معين ودا اكيد مهم .

7) ايضا انك تضع كل موضوع فى القسم الخاص بيه دا شئ مهم علشان القارئ مثلا ما يدخلش قسم الرياضة ويلاقى موضوع عن كيفية تربية دود القز .

8) كمان من المهم جدا انك تتابع الجديد فى الانترنت وتختار بعناية مواضيعك علشان تفيد الاعضاء بمعلومات قيمة , وزى ما اتش قال لازم يبقى عندك فكرة وخلفيه عن اللى بتكتبه علشان ما تقعش فى الاحراج .

9) دى نقطة بقى عايز اكد عليها ... ان يا جماعة كون المشرفين ما ردوش على موضوع فدا لا يقلل من اهميته .. الموضوع الجيد بيتكلم عن نفسه وعلشان كدا كل قسم ليه مشرفيه اللى بيتابعوا مواضيعه اول بأول .

10) ود المهم بقى علشان مسك الختام .... كح كح ... ماحدش يسأل اتش على ادوية تانى ابدا حتى لو برد خفيف وتقلوا فى الهدوم علشان احنا خلاص بقينا عظمة كبيرة وحاسس ان شوية واحضر العزا بتاعى .. ماشى يا عم اتش .. عواجيز ... هههههههه ماشى يا عم ... حسابنا بعدين