اهلا بيك يا محمد معانا
على ما اعتقد ان مفيش روابط تقدر تنزل منها الكورسات دى
انا اللى عاوزة اوضحة انك لازم تحضر المحاضرات
وتكون كمان جزء من المصدر اللى هتذاكر منة
لان محدش فينا يقدر يذاكر كورس الفيزياء من المحاضرات
المحاضرة بتتكلم عن نقط مهمة
انت بقى دورك انك تفتح الكتاب وتشوف العنوان اللى دكتور كتبها
فين بالضبط فى الكتاب وتقراء اللى تحتة وتحاول تتطلع المفيد منة
ولو مش حابب الكتاب براحتك مفيش حد بيحبة اصلا
ذاكر من اى مصدر يعجبك المهم المحاضرة بتتكلم عن اية
وده الاساس بتاعك ..واوعى تعتمد على المحاضرة بس
لانها بتبقى تلخيص التلخيص ولما تروح الامتحان
هتكتب اكيد تلخيص تلخيص التلخيص
يبقى مش هتكتب حاجة اصلا.....
وفية برضة ملحوظة صغيرة الدكتور ساعات كتير بيغير فى الرموز
علشان يشوفك انت بتحضر ولا لا
وبتكتب باسلوبة ولا باسلوب مين بالضبط
واطمن الكتاب اصلا فية كتير منة بيتلغى
يعنى الحرارة كنا واخدين اربع شباتر والخواص ثلاثة باين
وعلى فكرة الدكتور اللى بيديكوا حرارة كويس جدا جدا كمان
اهم حاجة عنده ان الطالب يفهم ومش يحفظ
ومن الاخر كدة الحرارة والخواص عاوزين حفظ
علشان كدة مكنتش بحبها
نيجى بقى للكهربية الذ مادة فى الفيزياء كلها
مش محتاجة منك حاجة ابدا غير انك تفهم اول شبتر
بدام فهمتة يبقى خلاص الكل بعد كدة مبنى علية
ومفيش فيها حفظ كتير اخرها تعريف
بس معتمده على المسائل والمسائل فى الكتاب مهمه جدا
الكورس ده اصلا مسائل وبس
وعلى فكرة برضة الدكتور اللى بيديكوا كهربية
انا ضامنة انه هيفمهلكم كويس اوووى
لانه اصلا بيحب المادة دى جدا
الضوء بقى عيشوا معاه
من الاخر برضة كله حفظ
نوع ما فية جزء من الضوء اللى فى الثانوى
مغناطسية ادعوا انها تتلغى زى ما اتلغت
بس اطمن كل حاجة بتتلغى هتاخدوها تانى
يعنى لو اتلغت من التيرم الاول هتاخدوها فى التانى
على فكرة ممكن متفمشى الحاجة من اول مرة
وده عادى جدا انما لو قريتها مرة واتنين هتلاقى فى كل مرة حاجة
مكنتش فهمها وفهمتها
بالنسبة للغة والله العظيم بعد كدة مش هيبقى فيها اى مشكلة
وهو فية حل بسيط جدا ترجم صفحات الكتاب
بس بلاش الترجمة الحرفية بتاعت ثانوى دى
يعنى الكلمة اللى مش فاهمها او مش قادر تستنتج معناها
هتلاقى الكلام ده كلة اتكرر فى باقى الصفحات
ومش محتاج تترجم تانى
وطبعن الامتحان وخصوصا بالنسبة للمجموعة كلها
فهى فعلا بتكون صعبة يعنى مش صعبة
يعنى جاية على اساس انك طالب رياضة وفيزياء
مش كيمياء او نبات وحيوان
وهتلاقى كمان طلبة كيمياء بياخدوا مواد الفيزياء اللى انت بتتدرسها دى
فى التيرم الواحد هما بياخدوها على مدار الترمين
مش تفرقة ولا حاجة هما كمان بياخوا فى الكيمياء اكتر مننا
وامتحانتهم كمان اصعب ..زبس تخيل انك دارس رياضة 2
وبتشتكى من الكهربية اومال هما بقى يعملوا اية
شيد حيلك والله انتم دفعة اخر دلع
الله يرحمنا بقى....دخلنا الكلية ولا فاهمين حاجة
ولا حتى حد فاهم يفهمنا .وما زلنا والله
المهم شيدوا حيلكم هانت هى السنة دى وتخلص من الكيمياء والفيزياء
وابقى عيش بعد كدة مع الرياضة زى ما احنا عايشين بالضبط
ياريت تكون استفدت ولو جزء صغير جدا من كلامى
وياما فكرنا زيكم وحسينا كمان بالاحساس اللى انتم حاسين بية
بس والله احنا عملنا اللى علينا والحمد لله ربنا وفقنا
