C# 2008 ... مشاكل وحلول

C# 2008 ... مشاكل وحلولالسبت أبريل 04, 2009 11:22 pm

السلام عليكم ورحمة الله وبركاته

الموضوع دا تم فتحه علشان نتبادل كلنا الخبرات فى مجال البرمجة بإستخدام السى شارب

كلنا السنة دى دخلنا عالم البرمجة بسرعة وكتير موافقنى على الرأى دا

هنا فى الموضوع هنحاول نمهد لكم إزاى تفكر كمبرمج وإزاى تعرف برنامجك هيشتغل إزاى

وبالتأكيد أى حد عنده مشاكل فى برامجه سواء اللى بيتم تدريسها فى الكلية أو أى برامج خارجية شغال فيها

علشان كدا هيسعدنى إنى أتلقى مشاكلكم ونحاول نحلها كلها بإذن الله

بالنسبة طبعا للأخوة اللى مش عايزين يحطوا برامجهم كاملة خوفا من سرقتها فممكن يضعوا هنا الجزء اللى فيه الخطأ وهقوم بتصحيحه لهم

أما اللى عنده مشاكل كتير فى برنامجه فممكن يبعتلى البرنامج بتاعه فى رسالة خاصة حفاظا على حقوقه

شكرا ليكم

رد: C# 2008 ... مشاكل وحلولالسبت أبريل 04, 2009 11:42 pm

ياسلاااااام يامانو
موضوع جمييييل جدا ومهم

وفعلا عايزين نفتح النقاش في اننا
ازاي نقدر نتعلم البرمجه
ونفهمها وازاي نكون مبرمجين

ومنتظره التفاعل من الاعضاء
ومننا كلنا
عشان نناقش الموضوع ده
لانه مهم جدا وخاصة بالنسبه لينا

وفين مواضيعك الجميله دي من زمان يامانووو

رد: C# 2008 ... مشاكل وحلولالسبت أبريل 04, 2009 11:46 pm

ال Flow Chart خطوتك الأولى

بسم الله الرحمن الرحيم

بالنسبة للبرمجة فأنا شايف إنها مش أكواد بس

مستوى البرمجة وقوة برنامجك هيا مستوى وقوة تفكيرك وقوة الألجورزم اللى هتستخدمه

بالنسبة ليا فأنا شايف إن المحاور الرئيسية فى البرمجة هيا الاتى :

1) تشغيل سهل ومبسط للبرنامج بحيث إن المستخدم ما يتوهش وسط ألاف الزراير والتكست بوكسز وخلافه .

2) وصول سهل لخيارات البرنامج بحيث إن المستخدم ما يشعرش بالملل لكثرة الخيارات والتعديلات اللى ممكن يجريها على البرنامج .

3) رسائل خطأ سهلة وبسطية بحيث إن المستخدم يفهم إية الخطوة اللى مش مضبوطة ويقدر يعدلها بسهولة .

وعلشان تقدر إنك تطور برنامجك بسهولة فإنت مش محتاج معرفة قوية بالأكواد لأن الأكواد سهل تجبها من أى مكان المهم إن تعرف إزاى توظف الأكواد دى صح .

وزى ما قلت فوق الأهم فى عملية البرمجة كلها إنك تعرف برنامجك هيشتغل إزاى

وهنا بقى تظهر أهمية ال Flow Chart اللى بيمكنك من معرفة خطوات تشغيل البرنامج واحدة واحدة وهو مهم من ناحيتين أساسيتين :

1) عند تطوير البرنامج لازم تعرف إنت عايز تضيف أى شيئ جديد فين بالضبط فى البرنامج وإية الجزئية اللى محتاجة تعديل أو تطوير .

2) عند وجود خطأ فى البرنامج لازم تعرف مكان الخطأ فين وتصلحه بسرعة دون السباحة وسط الآف السطور من الأكواد .

وطبعا كل ما يكبر برنامجك كل ما يكون ال Flow Chart أهم بالنسبة ليك .

طيب دلوقتى إزاى أعمل ال Flow Chart اللى بتقول عليه دا ؟

قبل ما تبدأ فى برنامجك لازم تجيب ورقة وقلم وتحط الخطوات الأساسية عليها

يعنى مثلا برنامج اللألة الحاسبة الورقة بتاعته هيكون شكلها إزاى :

1) الوظائف الأساسية اللى عايز الألة تنفذها ... جمع ... ضرب ... لوغاريتم ... Sin وهكذا .

2) طريقة عمل الوظائف دى ... أولا لما يدخل رقم فى التكست بوكس يتحفظ فى متغير ... والرقم التانى يتحفظ فى متغير تانى ... بمعنى أصح تعمل حصر للمتغيرات اللى هتستخدمها .

3) الكنترولز اللى هتستخدمها وطريقة توزيعها ... لما ترسم الالة الحاسبة فى ورقتك هتقدر إنك تعدلها بسهولة وتأخد أراء الناس فيها علشان تشوف سهلة الإستخدام أم لا .

4) الخطوات اللى هتشتغل بيها الألة الحاسبة ... يعنى مثلا الدوال المستخدمة فى برنامجك وتوزيعها على الكنترولز الموجودة عندك .

5) البدء فى تصميم برنامجك بالسى شارب وأكيد هتكون سهلة جدا طالما إنت عارف هتشتغل إزاى وبرنامجك هيتسلسل خطواته إزاى .

أتمنى إن يكون الشرح سهل وبسيط وما فيهوش مشاكل وفى إنتظار ردودكم قبل الدخول فى النقطة اللى بعد كدا

شكرا ليكم

رد: C# 2008 ... مشاكل وحلولالأحد أبريل 05, 2009 10:47 am

جزاك الله خير الجزاء أخ مانو

أسلوبك سهل وبسيط ما شاء الله

منتظرين الخطوة الجايه ان شاء الله وتكون فى اقرب وقت

رد: C# 2008 ... مشاكل وحلولالأحد أبريل 05, 2009 11:15 am

مشكور يا مانو
ومنتظرين منك المزيد

رد: C# 2008 ... مشاكل وحلولالأحد أبريل 05, 2009 12:38 pm

جميل قوي يامانو شرحك
وده فعلا بدايه حلوه وجميله
بس احب اقول واضيف حاجه
كل البرامج الخاصه بالبرمجه والمبرمجين
كل البرامج واحده في ذاتها ولكن يختلفوا في الشكل
ولكن الهدف واحد
وفيه اختلاف من حيث البساطه والصعوبه
وده بيفرق من مبرمج للتاني ومدي اختياره للبرنامج الملائم ليه
ومش شرط السي شارب بس
وفيه الفيجوال بيزك
والسي بلس بلس
وغيره من البرامج المهمه والجميله واللي نقدر نتعلمها
بسهوله ويسر

وان شاء الله هجيب ليكو قريب حاجات كبدايه لتعلم ازاي فكرنا يوصل لعمل برنامج معين
مطلوب مننا
وازاي نقدر نستخدم اي برنامج من البرامج المشهوره ولكن مع اختلافهم في ايه ....

رد: C# 2008 ... مشاكل وحلولالأحد أبريل 05, 2009 3:14 pm

شكرا يا مانو علي المساعدات دي ومنتظرين منك المزيد والافضل

رد: C# 2008 ... مشاكل وحلولالأحد أبريل 05, 2009 9:30 pm

شكراااااااااااااااااااااا يا مانو على الموضوع ده

2) عند وجود خطأ فى البرنامج لازم تعرف مكان الخطأ فين وتصلحه بسرعة دون السباحة وسط الآف السطور من الأكواد

ودى فعلا اهم حاجه عايزين نعرفها

فى انتظار النقطه اللى بعد كده يا رب تكون قريب

رد: C# 2008 ... مشاكل وحلولالأحد أبريل 05, 2009 10:33 pm

كويس اننا بنساعد بعض بالشكل ده اسلوبك جميل ومفهوم

رد: C# 2008 ... مشاكل وحلولالأحد أبريل 05, 2009 10:38 pm

شكراااااااااااااااااااااااااااااااااااااااايا مانو

رد: C# 2008 ... مشاكل وحلولالإثنين أبريل 06, 2009 11:51 pm

السلام عليكم ورحمة الله وبركاته

شكر لكل اللى ردوا على الموضوع

وشكرا ليكى يا قمر الليل على إضافتك الممتازة دى

لكن انا حددت برنامج السى شارب علشان هو اللى شغالين عليه فى الكلية السنة دى

بالاضافة إلى إنهم لم يدرسوا عدة لغات علشان يقدروا يختاروا بينهم أفضل لغة

نكمل دلوقتى إن شاء الله الخطوة التانية ومعلش على تأخيرى لانى مكنتش محضر كلام امبارح اقوله

رد: C# 2008 ... مشاكل وحلولالإثنين أبريل 06, 2009 11:57 pm

حصر المنافسين ... خطوتك الثانية

بالتأكيد اى هيئة أو شركة عايزة تطرح فكرة أو منتج جديد لازم يكون المنتج دا بيقدم حاجة جديدة مش موجودة سابقا فى السوق وحتى لو موجودة فيبقى لازم تقدم منتجك فى شكل جديد تماما الناس مش متعودين عليه ولا شافوه قبل كدا .

علشان كدا لازم قبل ما تبدأ فى برمجة برنامجك الجديد لازم تشوف برامج منافسيك ... تعمل حصر للمنافسين ومستوى قوة برامجهم ... تعرف برامجهم بتقدم خدمات شكله عامل إزاى ... إية الأخطاء الموجودة عندهم وإزاى تتفاداها فى برنامجك ... إية الخدمات اللى نسوا يضيفوها واللى لو ضفتها إنت فى برنامجك هيزودك نقاط فى منافستك أمامهم .

ممكن نقول على المرحلة دى مرحلة دراسة أكتر منها مرحلة برمجة وتصميم ولكن رغم كدا ماحدش يقدر ينكر أهميتها فى التأثير على مستوى تميز وتفرد برنامجك عن البرامج الأخرى ... لآن مفيش مستخدم هيستخدم أو حتى يشترى برنامج مكرر .

الكلام دا كله أكيد مهم بالنسبة ليك كطالب فى أحصاء وحاسب وخاصة إن دا هيكون مجال شغلك إن شاء الله بعد الكلية ... يعنى كل ما يكون فى دماغك أساسيات أكتر كل ما تكون مهمتك أسهل فى مقابل الطلبة التانين اللى ممكن تفوتهم حاجات بسيطة زى أساسيات التسويق والدعاية .

رد: C# 2008 ... مشاكل وحلولالثلاثاء أبريل 07, 2009 12:42 am

بجد جميل قوي قوي يامانو

وده فعلا لازم يؤخذ في الاعتبار ومهم
لاي شخص عايز يشتغل في مجال البرمجه

وميرسي كتير والله يامانو

وكمان كنت اقصد بأضافتي
انا عن نفسي مش كنت اعرف ان كل البرامج هدفها واحد
ولكن مضمونها مختلف
فحبيت اول للكل
ان علينا بعد طبعا الدراسه
لان طبعا في الكليه مش بندرس كل شئ
ولازم ننمي نفسنا بقدر المستطاع
ونعرف الجديد دايما علي قد ما نقدر

ولحد دلوقتي انا بسمع عن اسماء برامج
الي الان لا اعرفها
واتمني وبحاول اعرفها بالفعل

فياريت كلنا يكون عندنا حب البحث عن الجديد

ولكن نظرا لان الكل عايز ينجح في اللي احنا فيه وبس
فبنذاكر ومش بنشوف الا اللي عندنا وبس

فاتمني من الجميع لا يتوقف بل يستمر في بحثه عن الجديد دائما

وتاني ميرسي ليك كتير يامانو علي مساعدتك لينا كلنا
والوصول للطريق اللي هيوصلنا لاننا نكون مبرمجين صح
وازاي نوصل ليه

رد: C# 2008 ... مشاكل وحلولالثلاثاء أبريل 07, 2009 8:48 pm

شكرا ليك مانو

ومنتظرين الجديد ان شاء الله

ممكن لو سمحت يا أخ مانو تكتب لينا شويه عن المصفوفات

علشان هيه مشكلة بالنسبة ليا وأكون شاكرة ليك جدا

رد: C# 2008 ... مشاكل وحلولالثلاثاء أبريل 07, 2009 9:14 pm

شكرا لك
اتمنى اننا نستفاد قول يارب

رد: C# 2008 ... مشاكل وحلولالأربعاء أبريل 08, 2009 3:18 am

السلام عليكم ورحمة الله وبركاته

أنا كنت بسأل نفسى إمتى هتقولوا عايزين ندخل فى الجانب العملى بقى وكفاية النظرى

لكن كويس جدا إن فى تفاعل وفى ناس عايزة تشتغل

بالنسبة بقى للمرحلة الثالثة فهى البدء فى التصميم وكنت هشرحلكم الكنترولز ويليها بعد كدا البرمجة

ولكن طبعا كلنا والحمد لله معندناش مشاكل فى إستخدام الكنترولز المختلفة فى السى شارب وعارفين أغلبها خصائصه إيه وازاى بنستخدمه

يبقى ندخل بقى على أهم جزء فى موضوعنا دا وهو البرمجة

بالنسبة لطلبك يا مسملة فأنا تحت أمرك

هوضح بس نقطة صغيرة وندخل مباشرة فى المصفوفات

رد: C# 2008 ... مشاكل وحلولالأربعاء أبريل 08, 2009 3:26 am

خطوتك الرابعة ... البرمجة

زى ما الجاسوس الجيد هو صاحب الأدوات الجيدة

فبرضه المبرمج الجيد هو صاحب الأكواد الجيدة

المبرمج الجيد هو المبرمج اللى بيحقق العوامل التالية فى برامجه :

1) سرعة فى الأداء بيحيث ما يكونش تقيل فى التحميل وبدء التشغيل .
2) إستهلاك ذاكرة أقل حتى يكون البرنامج سريع فى آداء الوظائف المطلوبة منه .
3) أكواد أقل وفى نفس الوقت تنظيم أكثر فى البرمجة وعدم التداخل بين الأكواد دى .

يبقى علشان نكون مبرمجين كويسين لازم يكون عندنا خلفية جيدة فى الأكواد والحمد لله السى شارب نفسه فى مكتبة مساعدة أكثر من ممتازة لكن محتاجة بس تركيز علشان توصل للى عايزه .

ممكن توصلها عن طريق Help >>> Search وبعدها نكتب موضوع البحث المطلوب .

دا غير المصادر المختلفة زى النت والكتب الالكترونية والكتب العادية المنتشرة فى المكتبات .

وإن شاء الله هننزلكم بموضوع خاص فقط بدوال السى شارب والكلاسز المختلفة وأساليب الشرط والاستثناء واستخداماتها بيحيث يكون كمرجع ليكم ان شاء الله .

رد: C# 2008 ... مشاكل وحلولالأربعاء أبريل 08, 2009 3:51 am

بالنسبة للمصفوفات فهندخل فيها من البداية من أول إزاى تعمل مصفوفة لحد ما تعمل برنامج المصفوفات والعمليات عليها

أولا / التعريف Declaration

int[] mano1 = new int[5] { 1, 3, 5, 7, 9 };
int[] mano1 = new int[] { 1, 3, 5, 7, 9 };
int[,] mano2 = { { 1, 2, 3 }, { 4, 5, 6 } };
int[][] mano3 = new int[3][];
string[] mano4 = { "mano", "tanto" };

دول يعتبروا أشهر الطرق للتعبير عن المصفوفات والإعلان عنهم

الطريقة الأولى دى بتحدد للبرنامج أمر إنشاء مصفوفة ذات بعد واحد وعدد عناصرها 5 عناصر وتم تحديدهم للبرنامج .

الطريقة الثانية نفس الأولى مع إختلاف إنك بتدخل أى عدد من العناصر دون تحديد عددهم مسبقا للبرنامج .

الطريقة الثالثة دى بتحدد للبرنامج أمر إنشاء مصفوفة ذات بعدين وعدد عناصر كل واحد منهم تم تحديده فى مجموعتين .

الطريقة الرابعة دى عبارة Jagged Array أو مصفوفة داخل مصفوفة ودى مش هنتعرض ليها دلوقتى غير فى وقتها .

الطريقة الرابعة بتعرفنا إنه ممكن يكون العناصر متغيرات حرفية من نوع string ومش شرط دايما إن العناصر تكون أعداد .

طيب دا بالنسبة للمصفوفات كإعلان عن نوع المصفوفة والعناصر اللى فيها .

نيجى دلوقتى إلى كيفية التعامل مع عناصر المصوفة نفسها ففى كلاس او لوب بمعنى أصح من أشهر اللوبات فى التعامل مع عناصر المصفوفات واسمها Foreach .

foreach ( int i in mano1 )
{
Console.Write( "\t{0}", i*3 );
}

الأمر دا معناه إية ... إنه لكل عنصر i فى المصفوفة اللى إسمها mano1 ... عايزك تعمل الاتى ... تفتح قوس معقوف علشان دى لوب مش بتهزر ... انا عايزك تطبع لى عناصر المصفوفة دى بعد ما تضرب كل عنصر منها فى 3 مثلا ... وهنا إستخدمت الطباعة بطريقة الاندكس index علشان أطبع العناصر وفى نفس الوقت أعرف أستخدم تنسيق المسافات بين العناصر ... بعد كدا تقفل قوس اللوب foreach .

طيب بالنسبة لإدخال عناصر مصفوفة بنفسى ... يعنى انا كمبرمج أكيد بعرف المصفوفة بالعناصر بتاعتها واشتغل مفيش مشاكل ... لكن دلوقتى انا عايز ادخل العناصر دى أثناء ما البرنامج شغال ... أتيح للمستخدم خيار إدخال العناصر بقى إزاى ؟

الخيار المنطقى هنا إننا نستخدم لوب لإدخال العناصر دى وطبعا على حسب عدد المصفوفات بتاعتك هتعمل لوبز لكل واحدة .

نشرح بقى دلوقتى كيفية إدخال عناصر مصفوفة وبعد كدا نشتغل على مصفوفتين والعمليات عليهم .

بعد ما نقوم بتعريف المصفوفة فى أعلى البرنامج ونختار نوعها ذات بعد أو بعدين هنبدأ فى كود الإدخال :

int[,] mano1 = new int[2,2] ;

for (int i = 0; i <= 1; i++)
for (int j = 0; j <= 1; j++)
{
Console.Write("\nInput the element {0} , {1} in matrrix :\t", i + 1, j + 1);
mano1[i, j] = int.Parse(Console.ReadLine());
}

هنا عملنا إية ... قمنا بتعريف مصفوفة ذات بعدين وحجمها 2 فى 2 مربعة يعنى ... وبعدين عملنا لوب وجواها لوب تانية علشان نقدر ندخل البعدين i و j ... وبعد كدا عملنا تخصيص للعناصر دى وسكنا كل عنصر فى مكانه فى المصفوفة ... طيب تمام ... بعد كدا عايزين نطبع المصفوفة دى ولا هندخلها البرنامج وشكرا على كدا ؟ .

نيجى بقى للوب الطباعة :

for (int i = 0; i <= 1; i++)
{
for (int j = 0; j <= 1; j++)
{
Console.Write("{0}\t", mano1[i, j]);
}
Console.WriteLine();
}

دى بقى لوب الطباعة ... قمنا بعمل لوب متداخلة لان البرنامج هيطبع عناصر مختلفة i و j وبالتالى لوب لطباعة دا ولوب لطباعة البعد التانى .

يا ريت تكون المصفوفات بقت أسهل ليكم دلوقتى عن الأول وإن شاء الله أنا تحت أمركم وإعذرونى على التأخير أحيانا لانى مش بكون محضر كلام أقوله لانى عندى مليون حاجة عايزة تخلص .

شكرا ليكم وإن شاء الله مستنى تعليقاتكم وأسئلتكم ... هو سؤال بالتحديد اللى بدور عليه علشان اعرف انتوا صاحين معايا ولا لآ ؟ .

ياريت لو الاكواد مش شكلها تمام تاخدوها فى البرنامج وتجربوها افضل لانها هنا بايظة بسبب التنيسق لكنها بتكون سليمة لو نسختوها وحطتوها فى البرنامج

يلا سلام

رد: C# 2008 ... مشاكل وحلولالخميس أبريل 09, 2009 7:21 am

شكرا ليك كتير مانو حبيت دلوقت اشكرك بس على استجابتك لطلبى

وبعد ما ارجع من الكلية ان شاء الله هكتب البرنامج وهطبقه

ولو فيه اى استفسار اكيد هسالك ان شاء الله

بسال كتيرمعلش بقى

رد: C# 2008 ... مشاكل وحلولالخميس أبريل 09, 2009 5:59 pm

شكرا يا مانو على المساعدات دي
بس يا مانو ليس بدري علي الكلام دة احنا محتاجين نعرف الاول نعمل برنامج وبعد كدة نعرف نتميز
ازاي دي وجة نظرك لانك متمكن ما شاء الله لكن احنا ليسة في البداية محتاجينك تساعدينا حتي نجتاز الخطوة الاولي ياريت تراعي اننا لاول مرة ندخل عالم البرمجة
جزاك اله عنا كل خير

رد: C# 2008 ... مشاكل وحلولالخميس أبريل 09, 2009 6:16 pm

شرح المصفوفات رائع يامانو ودا الاسلوب الي كنت بقول علية تبسيط المعلومة للغلابة الي زينا
thank you mano

رد: C# 2008 ... مشاكل وحلولالخميس أبريل 09, 2009 6:35 pm

الحمد لله انا جربت البرنامج بتاع المصفوفات وشغال كويس والحمد لله

لكن ليا سؤال هوه ليه محطيناش اقواس معقوفة بعد اللوب الأولى فى الإدخال وحطيناها فى اللوب الأولى بتاعت الطباعة-م كل لوب لاز نفتح ليها اقواس معقوفة-ة

ليه عرفناهم مرتين مرة فى لوب الإدخال ومرة فى لوب الطباعةi,j

وهل فيه حل للمصفوفات اللى عددها اكبر من كدا يعنى 6*6او10*10

لان هيكون من الصعب ان انا اقعد ادخل كل الأرقام دى واذا نسيت رقم فى نص عمليه الإدخال وعملت انتر الدنيا كلها بتبوظ وبرجع ادخل من اول وجديد

jagged array

دى ليها استخدامات معينة ولا ايه كل اللى اعرفه عنها ان هيه مصفوفة المصفوفات

يعنى هيه مصفوفة مكونة من مصفوفات داخلها بس معرفلهاش استخدامات

ومستنيين الكتاب بتاع الدكتور

معلش تاعبينك معانا بس ربنا يجعله فى ميزان حسناتك ان شاء الله

رد: C# 2008 ... مشاكل وحلولالجمعة أبريل 10, 2009 12:22 am

السلام عليكم ورحمة الله وبركاته

شكرا لكل اللى ردوا على الموضوع ويا رب ان شاء الله نستفيد كلنا

the Diamon

بس يا مانو ليس بدري علي الكلام دة احنا محتاجين نعرف الاول نعمل برنامج وبعد كدة نعرف نتميز
ازاي

انا كنت ماشى والله واحدة واحدة لكن انتم اللى طلبتم الدخول فى البرمجة وشرح المصفوفات

لكن عموما زى ما قلتلكم انا وTanto بنجهز ليكم موضوع هيلم أغلب الأكواد وهيكون مقدمة ممتازة ليكم

أما الموضوع دا فهو للمشاكل والحلول اللى بتقابلكم واللى محتاجين تفهموها

مسلمة

لكن ليا سؤال هوه ليه محطيناش اقواس معقوفة بعد اللوب الأولى فى الإدخال وحطيناها فى اللوب الأولى بتاعت الطباعة-م كل لوب لاز نفتح ليها اقواس معقوفة-ة

هو دا السؤال اللى كنت مستنيه وكويس ان فى ناس شغالين ومنتبهين للجزيئات دى

بالنسبة لاى لوب او دالة If او اى دالة تانية مش بتطلب دايما يكون فى اقواس معقولة طالما ان فى سطر واحد فقط هيتنفذ

لأن الأقواس المعقوفة دى بتتحط لما يكون فى اكتر من أمر هيتنفذوا وانا عايز ابلغ البرنامج انهم خاصين باللوب دى وليس بباقى البرنامج

تابعوا معايا الجزء دا

If (x ==1)
Console.WriteLine("Mano");
else
Console.WriteLine("Tanto");

هنا البرنامج دا هيتنفذ بدون مشاكل برغم وجود اقواس معقوفة ...لية ؟ ... لأن المطلوب تنفيذه هو سطر واحد وليس اكثر من سطر علشان كدا مفيش داعى للاقواس

If (x ==1)
{
Console.WriteLine("Welcome");
Console.WriteLine("Mano");
}

هنا فى اكتر من أمر واكتر من سطر هيتنفذوا فعلشان كدا اضطرينا نحط الأقواس المعقوفة علشان نفهم البرنامج ان السطور دى تبع دالة If وليس مجرد أول سطر كما فى المثال الأول

طيب بالنسبة للمصفوفات ؟؟؟

أولا : لوب الإدخال

اللوب الأولى جواها أمر واحد فقط ... هو اللوب التانية

طيب ماهى اللوب التانية فيها أمر واحد فقط ... هو أمر الادخال ... لية عملنا حواليه أقواس معقوفة بقى ؟؟؟

هنا عندك أكتر من لوب فى البرنامج ... ولازم تحدد بقى شغل كل لوب منهم علشان ما يحصلش تداخل بينهم والبرنامج يطلع خطأ

كمان الأقواس فى اللوب التانية علشان تفهم البرنامج انه دخل اللوب التانية يخلصها وبعدا كدا يرجع تانى للوب الاولى يقرأها ومنها يكرر الموضوع تانى

فلازم تحدد بدايتها ونهايتها بالاقواس المعقوفة

ثانيا : لوب الطباعة

اللوب الأولى فيها أمرين هنا

أول أمر هو اللوب التانية ... تانى أمر هو سطر طباعة السطر الفارغ Console.WriteLine();

يعنى اكتر من امر يبقى لازم نعمل أقواس معقوفة هنا

اما اللوب التانية فزى ما قلت فوق علشان البرنامج يفرق بين وجود لوبين متداخلين ويعرف امتى يدخل ويخرج منهم

يبقى الخلاصة فى الجزء دا إن الاقواس المعقوفة تستخدم مع الأوامر المركبة أو الأوامر اللى بتتطلب أكثر من سطر واحد

**************************

كمان فى سؤال تانى ذكى خاص باعادة تعريف المتغيرين i و j فى اللوبين ورغم كدا البرنامج ما طلعش خطأ من إعادة التعريف

بالنسبة للمتغيرين دول فهما متغيرين محليين Local يعنى ... يتم تعريفهم واستخدامهم داخل الحلقات فقط ولا يتم قرائتهم خارجها فى باقى البرنامج

علشان كدا فى الحلقة الأولى عرفناهم واستخدمناهم واول ما نخرج من اللوب يختفوا ... فتحنا حلقة تانية يبقى لازم نعرف متغيرين تانين علشان نستخدمهم فى تحديد بداية ونهاية الحلقة واول ما نخرج من اللوب يختفوا

**************************

المصفوفات الكبيرة من الأحجام الكبيرة دى ملهاش حل للاسف لان المستخدم هو اللى بيدخل العناصر يعنى ما فيهاش مساعدة من البرنامح

*************************

jagged array

أيوة ليها استخدامات كتير ولكن فى البرامج المعقدة والكبيرة اللى بتؤدى وظائف اكبر ... انا بس قلت شكلها علشان الناس تفهم هيا اية لو شافتها فى برنامج تانى

*************************

أنا مبسوط جدا من تفاعلكم مع الموضوع برغم انى سمعت تعلقيات من بعض الزميلات الفاضلات اللى زعلانين من تأخرى فى إنزال الحاجات اللى الدكتور بيدهالنا فى المحاضرة

ودا مش بإيدى والله لآن النت أحيانا بيكون ضعيف وأحيانا بيكون عندى شغل بره الكلية وأحيانا مش بكون محضر الكلام

لكن على قد ما أقدر مش بتأخر عليكم لآن هدفى الأول والأخير هو إفادتكم لا اكتر ولا اقل

اما الكتاب وبرنامج الدرجات فهنزلهم كمان شوية على ما النت يتعدل

شكرا ليكم

رد: C# 2008 ... مشاكل وحلولالجمعة أبريل 10, 2009 1:07 am

بجد مفيش غير جزاك الله خيرا واكرمك دنيا واّخرة
بصراحة جهدك مشكور مانو ومفيش حد من حقه انه يعلق على حكاية انك تنزل الحاجات من الدكتور أو متنزلش
المفروض اننا نقدم لك جزيل الشكر على انك بتفكر فى تعليم غيرك اللى انت تعرفه وبتحاول تساعدهم وتسهل ليهم الأمور وبتضيع اكيد كتير من وقتك علشان تعمل كده وبعدين انت متأخرتش ولا حاجة الدكتور بس اتلخبط سهوا وادالك كتاب تانى .
بالنسبة للمصفوفات انا عملت عملية الجمع والطرح والضرب فى ثابت ولكن كان فيه مشكلة فى ضرب مصفوفتين لأن تبعا لقاعدة ضرب المصفوفات فالعنصر الأول فى المصفوفة الناتجة هيكون
[0,0]*[0,0] +[0,1]*[1,0]
هلاقى ان رقم الصف فى المصفوفةالأولى ثابت اما رقم العمود فى المصفوفة التانية هوه اللى ثابت بس انا مش قادرة اعمل ليهم لوبز تظبط الكلام ده هل افرض متغير معين بالكلام السابق واعرف ناتج المصفوفة بناء على هذا المتغير
وبالنسبة لبرنامج الدرجات فالحمد لله عملته هوه والإستمارة الشخصية هوه كان مجرد بداية يعنى فيه الدرجة وحساب التقدير والمجموع النهائى والتقدير النهائى لكن برده كان فيه مشكلة هظبطه ان شاء الله وابقى اجى استشيرك فى اللى هيقف معايا .
واخيرا جزاك الله خيرا مرة تانية

عدل سابقا من قبل مسلمة في الجمعة أبريل 10, 2009 1:39 am عدل 1 مرات

رد: C# 2008 ... مشاكل وحلولالجمعة أبريل 10, 2009 1:38 am

بالنسبة لاى عملية فى المصفوفات فدا هيكون الاساس اللى هنتحرك على اساسة

الاول تعريف المصفوفات المستخدمة

double[,] arr1 = new double[2, 2];
double[,] arr2 = new double[2, 2];
double[,] arr3 = new double[2, 2];

ثانيا إدخال العناصر

for (int i = 0; i <= 1; i++)
(int j = 0; j <= 1; j++)
{
Console.Write("\nInput the element {0} , {1} in matrrix 1 :\t", i + 1, j + 1);
arr1[i, j] = double.Parse(Console.ReadLine());
Console.Write("\nInput the element {0} , {1} in matrrix 2 :\t", i + 1, j + 1);
arr2[i, j] = double.Parse(Console.ReadLine());
arr3[i, j] = arr1[i, j] + arr2[i, j];
}

ثالثا الطباعة

Console.WriteLine("\nThe Sum :\n");

for (int i = 0; i <= 1; i++)
{
for (int j = 0; j <= 1; j++)
{
Console.Write("{0}\t", arr3[i, j]);
}

Console.WriteLine();
}

Console.WriteLine("\n\n");

وهنا دا مثال للجمع قمنا فى البداية بعمل لوبين علشان ندخل العناصر فى المصفوفة الاولى والثانية

يعنى لما نشغل البرنامج هيطلب العنصر الاول فى المصفوفة الاولى وبعد كدا يطلب العنصر الاول فى المصفوفة الثانية وهكذا

طبعا مفيش حاجة اسمها قسمة مصفوفات زى ما انتو عارفين ما تعملوهاش وتضحكوا المعيدين علينا

اما بالنسبة بعملية الضرب فلو غيرنا العملية بين المصفوتين هتشتغل برضه لكنها رياضيا مش مضبوطة لان فى البرنامج هيضرب كل عنصر فى الاولى فى العنصر المقابل له فى المصفوفة الثانية ودا غير ضرب المصفوفات المعرف لدينا

التغلب على مشكلة تعريف الضرب السليم للمصفوفات هنأجلها شوية لحد ما الناس تفكر فيها وتقدم لها حلول وبعد كدا نقولكم عليها

اهلا بك يا زائر لديك 16777214 مساهمة

C# 2008 ... مشاكل وحلول

descriptionC# 2008 ... مشاكل وحلولالسبت أبريل 04, 2009 11:22 pm

descriptionرد: C# 2008 ... مشاكل وحلولالسبت أبريل 04, 2009 11:42 pm

descriptionرد: C# 2008 ... مشاكل وحلولالسبت أبريل 04, 2009 11:46 pm

descriptionرد: C# 2008 ... مشاكل وحلولالأحد أبريل 05, 2009 10:47 am

descriptionرد: C# 2008 ... مشاكل وحلولالأحد أبريل 05, 2009 11:15 am

descriptionرد: C# 2008 ... مشاكل وحلولالأحد أبريل 05, 2009 12:38 pm

descriptionرد: C# 2008 ... مشاكل وحلولالأحد أبريل 05, 2009 3:14 pm

descriptionرد: C# 2008 ... مشاكل وحلولالأحد أبريل 05, 2009 9:30 pm

descriptionرد: C# 2008 ... مشاكل وحلولالأحد أبريل 05, 2009 10:33 pm

descriptionرد: C# 2008 ... مشاكل وحلولالأحد أبريل 05, 2009 10:38 pm

descriptionرد: C# 2008 ... مشاكل وحلولالإثنين أبريل 06, 2009 11:51 pm

descriptionرد: C# 2008 ... مشاكل وحلولالإثنين أبريل 06, 2009 11:57 pm

descriptionرد: C# 2008 ... مشاكل وحلولالثلاثاء أبريل 07, 2009 12:42 am

descriptionرد: C# 2008 ... مشاكل وحلولالثلاثاء أبريل 07, 2009 8:48 pm

descriptionرد: C# 2008 ... مشاكل وحلولالثلاثاء أبريل 07, 2009 9:14 pm

descriptionرد: C# 2008 ... مشاكل وحلولالأربعاء أبريل 08, 2009 3:18 am

descriptionرد: C# 2008 ... مشاكل وحلولالأربعاء أبريل 08, 2009 3:26 am

descriptionرد: C# 2008 ... مشاكل وحلولالأربعاء أبريل 08, 2009 3:51 am

descriptionرد: C# 2008 ... مشاكل وحلولالخميس أبريل 09, 2009 7:21 am

descriptionرد: C# 2008 ... مشاكل وحلولالخميس أبريل 09, 2009 5:59 pm

descriptionرد: C# 2008 ... مشاكل وحلولالخميس أبريل 09, 2009 6:16 pm

descriptionرد: C# 2008 ... مشاكل وحلولالخميس أبريل 09, 2009 6:35 pm

descriptionرد: C# 2008 ... مشاكل وحلولالجمعة أبريل 10, 2009 12:22 am

descriptionرد: C# 2008 ... مشاكل وحلولالجمعة أبريل 10, 2009 1:07 am

descriptionرد: C# 2008 ... مشاكل وحلولالجمعة أبريل 10, 2009 1:38 am