[ندعوك للتسجيل في المنتدى أو التعريف بنفسك لمعاينة هذه الصورة]
النتيجة السنادي زي الزفت في الجامعة كلها .. كلية هندسة تلت تربع الدفعة شايلة مواد .. كلية آداب فيها دكتور زرف الدفعة كلها ضاض جيم .. حضانة الدقهلية مش عارف إيه .. كل ما اقابل واحد يقولي النتيجة السنادي مش عارف مالها كده ..
أنا عارف ان كل حاجه بتتغير من حوالينا والأوزون اتخرم والحرارة جالها امساك والخضار غلي وكل الكلام اللي احنا عارفينه ده .. بس ان انا اخلل في الكلية مش ممكن !!
دي مش مأساتي الشخصية ..
ظاهرة التخليل الجامعي دي مابقتش في مصر بس ..
أبسولوتلي ..
دي في جامعة المنصورة و جامعة الزقازيق وسندوق وشبرا الخيبة ومعهد رجب ..
ليه بنخلل في الكلية لحد لما الواحد بيحس ان عنده تلف دماغي !!
ليه في طلبة بتتخرج وطلبة بتطول ؟؟
ليه العملية متمشيش زي السكينة في الحلاوة ؟؟
وانا أدعوا من هنا إلى إلغاء الشهادات الجامعية المصرية من الاعتراف الدولي ..
وبادعوا إلى إلغاء نظام التعليم المصري من أنظمة التعليم المعترف بيها .. لتصبح مصر دولة متخلفة ليس لديها نظام تعليم ..
الأسباب اللي أنا شايفها وجيهه جدا جدا ومنطقية جدا واقتنعت بيها جدا ..
وهي التالي :
1- التعليم المصري من الأنظمة القليلة في العالم اللي ليس فيها مجال لاختيار مجال الدراسة وانه اجباري .. وده علميا وعقليا ودوليا غير منطقي وغير سليم حيث انه من اساسيات التعلم أن يختار الطالب مجال دراسته في سن مبكرة !! – زينا كده - فاكرين أبله نجوى وقوضة الفران والخرزانه وسور المدرسة ؟؟- الكلام ده حسب الدراسة اللي بيعمل بيها على صعيد التعليم في الولايات المتحده .
2- نظام التعليم المصري به خلل رهيب جدا على صعيد أساسيات المعرفة البشرية .. إيه هو بقى !! .. تقسيم الكليات لكليات قمة وكليات قاع !!
وانت أصلا مش هتوصل لكلية قمة إلا إذا درست على إيد واحد متخرج من كلية قاع –تربية أو آداب - فمنين يبقى اللي بيأهل لكلية القمة من كليات القاع ؟؟؟
ناس عقلها تعباااان
3- الجامعات كلها بلا استثناء على مستوى العالم – لما اقول العالم يبقى تفكر في نص الخريطة اللي فوق ( اوروبا والأمريكيتين ) - الدخول ليها اختياري .. يعني انا اللي باختار كليتي والتخصص اللي نفسي فيه .. مش مكتب التنسيق ولو برغباتي ..
واحد عبقري جدا هيسألني دلوقتي يقول افرض واحد عنده تربنه في النفوخ وعايز يقدم في كلية طب يروح برضو ؟؟ هي مش ماشية بالمزاج ؟؟
أقوله لأ مش بالمزاج ..
لإن صاحبنا ده أكيد ماتولدش اول امبارح المغرب ..
ده في التعليم من زمان جدا ..
في أول 5 سنين تعليم أخد أساسيات اللغة ونبذة على التشريح والكيميا والفيزيا والاحياء والكمبيوتر والحاجات الحلوة دي وبانت ميوله وهو عرفها .. وبيختار مواده في المرحلة اللي بعديها وبتبقى مواد هو حاببها .. يعني مثلا واحد بيحب أبو العتاهية وشكسبير بتاع إيييييه يدرس ان ثاني بنكرياس البوتاسيوم بيتفاعل مع الحلبة !!
أنا اعرف الحاجات دي مفيش مشكلة من بعيد لبعيد انما اتخصص فيها ؟؟؟
وادرسها لحد ما يطلع عين اللي جابوني فيها وانا مش حاببها وفي الآخر اطلع من الثانوي لا ادرس ابو العتاهيه في الكلية ولا ادرس البيكربوناتو وادرس رى وصرف وستراكشر كلام إيه ده يا جدعان ؟؟
نرجع للواد بتاع طب
فالمفروض لما اختار مواد متعلقة بالطب في دراستي المدرسية هابرع فيها لإني حاببها وهتأهلني أجتاز امتحان القبول في الجامعه ..
بسيطه مش كده ..
ابقى دكتور عشان انا عايز ابقى دكتور ..
مش عشان امي عايزه تخطبلي بنت ام سلوى والبت شاطرة وهتخش طب ولازم ابقى دكتور عشان تتجوزني والهبل الاجتماعي اللي احنا فيه ده ؟!؟!؟!
للثلاث أسباب السابقة وأسباب أخرى كثيرة لم أرد ان اطيل عليكم بها .. فإني بإسم كل الطلاب الجامعيين وطلاب الثانوي والاعدادي والابتدائي أطالب السيد وزير التعليم العالي والغير عالي بتغيير نظام التعليم واحضار خبراء من فنلندا ليطبقوا لنا تجربتهم والتي حازوا بها على أفضل نظام تعليم في العالم .. والتي لا أرى مانعا على الإطلاق من تطبيقها هنا إلا لو كان التعليم الفاشل وتجهيل الطلاب والضغط على الأهالي هو سياسة الدولة وإلا فليتفضل سيادتهما بتقديم استقالتهما والتنحي والسماح للشعب باختيار بديل لهم ..
واحب أقولهم ان رمضان جي ورزقكم واسع والأهالي هيدعوا عليكم دعا في كل وقت .. قبل الفطار وبعد الفطار وفي التراويح وفي التهجد وقبل السحور وبعد السحور وقبل المدفع وساعة المدفع لإن الأهالي خلاص ..
جابوا جاز ..
واحنا لسنا بأحسن حال منهم ..
كلنا جبنا جاز وسبرتو
ولا ايه؟
وانا اسف ع اللغه الي اتكلمت بيها بس انا على اخري ..