[ندعوك للتسجيل في المنتدى أو التعريف بنفسك لمعاينة هذه الصورة]
ازيكم عاملين ايه
ياتري نفسكم تعرفو ايه الطريقه اللي ممكن بيها توصلو لانكم تخلو كل الناس راضيين عنكم
؟
ولا رضا الناس عنكم دا شئ ميهمكوش ؟
بيتهيالي لا مش كدا؟
اظن كل واحد نفسه يخلي الناس كلها بتتكلم عليه حلو وراضيه عنه
معظم الناس بتحب الرياء اذا مكنش كل الناس لان كله بيهتم برأي الناس فيه
طيب علشان شكلي هطول عليكم ادخل في كلامي علطول يمكن نوصل منه للطريقه المثلي لارضاء كل الناس
********
في مقوله قريتها قبل كدا بتقول
" يارب لقد فعلت ما ظننته صائبا لكن اخي الانسان ادان افعالي طوال الوقت
حاولت بافعالي ارضاء البشر لكنهم ضاعت انفسهم فضاعت نفسي ورائهم في النهايه "
الكلام دا يخليني اسال كل واحد فيكم
انت لحد امتي هتفضل مهتم براي الناس فيك؟
لاي مدي عايزهم يحبوك؟
ممكن تعمل ايه عشان ترضيهم؟
ولو حب الناس شئ وكسب احترامهم شئ تاني هتختار ايه؟
ووسط كل دا ايه الطريقه المثاليه اللي ممكن تتعامل بيها مع الناس؟
طيب تفتكر ممكن الناس تحبك علي ايه او ليه ...؟
اه
ممكن الناس تحبك لاسباب كتير منها انك جدع وخدوم
او رقيق وحساس
او اخلاقك عاليه
او ابن نكته وقعدتك حلوة
او انك شكلك حلو ولبسك ستايل
.........الخ
وعلشان الناس تحبك وترضيهم لازم تبقي كل دول في وقت واحد
يعني لو انتي بنت جدعه كدا وخدومة هيقولو عليكي دي عامله فيها ولد
ولو بقيتي رقيقه وحساسه هيقولو هي دوعه ومايعه كدا ليه
دا غير انك هتبقي فريسه لكل شاب من دول ماهيصدق يلاقي واحدة حساسه تصدق كلامو الحلو المترتب من غير ماتتعبه
وانت كمان لو كنت راجل جد وشديد كدا هيتقال عليك انك معقد اوي وان الضحكة مبتعديش عليك
ولو بقيت ابن نكته هيقولو عليك فرفور
طيب انت تقدر تكون كل دول مره واحدة؟
لو قدرت هترضي الناس وتكسب حبهم
انا بقي شايف انك مش ممكن تبقي كل دول
ولو قدرت بعد فتره ههيقولو عليك حلانجي ومعاكم معاكم عليكم عليكم
وهتفقد احترامهم ليك في النهايه
يبقي بردو مش هترضيهم
********
طيب عايز اسالكم
هو مين اصلا قال اننا مطالبين بكسب حب جميع مخاليق ربنا؟
مين وهمنا ان دا ينفع او ممكن يحصل؟
احمد رجب في (1\2 كلمه ) مره بيقول
ان في الدنيا بشر مشركين وملحدين وهندوس وغيرهم
يعني لو اجرينا استفتاء بين البشر علي حب الله _سبحانه وتعالي_ مش هيتفقوا
(بالطبع دا بمشيئه الله الذي لو شاء لامن به من في الارض جميعا لكن دي حكمته في خلقه )
طيب اذا كان كدا انت بقي يا انسان يا نكره عايز الناس كلها تحبك ؟
********
طيب في حاجة كمان مهمه
وهي انك لو هتسعي لارضاء الناس لازم تاخد في اعتبارك ان اغلب البشر
معايرهم اللي بيحكمو من خلالها علي الناس مش واضحة
وومكن تشوبها بعض المصالح والاهواء والشهوات ....الخ
لكن الناس المحترمه هتقدرك لاخلاقك
فتلاقي نفسك مش محتاج انك ترضيهم في حد ذاتهم قد منتا محتاج تراعي ضميرك
وتتقي ربنا في افعالك
تقوم تلاقي انك وانت بتعمل دا علشان تحسن نفسك وتقرب من ربنا
انك اكتسبت حب ناس محترمه من غير ماتسعي ليهم
( طبعا حب المحترمين بس ليك هو اللي يهمك
ومتستغربش هما هيحبوك لانك هتكون ساعتها انسان محترم
زيهم تمام !
في ناس قليله جدا يا جماعه هما اللي بيعرفو يحسبو كل خطوه في علاقاتهم
مع غيرهم من الناس
ويدرسوهم كويس علشان يملكو مفاتيحهم
طبعا كلنا نتمني نكون من الناس دول مش كدا ؟
بس معظمنا للاسف بيتاثر ببعض وبظروف الحياه المحيطة بينا
في مفاهيم كتيره في حياتنا اتراكمت من عادات ملهاش اساس وصلتلنا من جيل لجيل
خلتنا دايما نبص للناس ونعمل الف حساب لحكمهم علينا
دا غير ان معظمنا اتربي الي حد كبير علي انعدام الاستقلاليه وضعف الشخصيه
ادام سلطة الاهالي اللي سمحو للمجتمع يتحكم فيهم وفينا فوصلنا لمرحله اننا
ماشيين نبحلق لبعضونرمي ودننا لكلام بعض
محدش فينا عاتق التاني لان كله عايز يحكم علي كله
مش عارفه ليه مش كل واحد فينا يخليه في حاله ويحكم علي نفسه بدل ما يتكلم ع الناس
وليه لما بنحكم علي نفسنا بنقيس نفسنا ع الناس وليه اصلا بنسعي لاننا نرضي الناس
؟؟...........
*********
انا عارف اني سرحت في الكلام وزمان اللي بيقرا دلوقتي نفسه يسال انا عايز اوصل لايه
كل اللي انا شايفه صح هو اني انا وانتي وانت مش علينا حاجة غير المعامله الحسنه
حسب تعاليم ربنا وحسب اللي يرضينا
مش مهم انت ولد ولا بنت المهم اننا محدش بيغلط في التاني
اللي انت شايفو صح ويرضيك اعمله
وميهمكش من راي حد فيك
لانك علي اي حال مش هترضي كل الناس
فكمان مش تخلي نفسك غير راضي عن نفسك
*********
لو مقتنعتش بكلامي .. دي حريه شخصيه
ولو اقتنعت حاول تعمل بيه
ولو حاولت تعمل بيه وفي مره نسيت
حاول تفتكر الجمله دي وتسالها لنفسك دايما
"هكذا هي الدنيا منذ بدء الخليقه صراع كلاب احمق علي عظمة صغيره
فماذا تجني لو اكلت العظمة وحدك وخسرت نفسك ..... الحقيقه"
بيتهيالي اننا محتاجين نرضي عن نفسنا
ومتحاجين نحب نفسنا بصرف النظر عن راي الناس فينا
وقبل كل دا محتاجين نعرف نفسنا صح قبل ما نعرف راي الناس ونقتنع بيه مش يمكن يكون اللي بيقولوه مش فينا
********
اه قبل ما امشي
يهمني اشوف ردودكم علي الموضوع
مدي رضاكم عنه
