هام بخصوص حملة اعرف فصيلتك

منتدى علوم المنصورة :: ثورة العِلم :: مبادرة ثورة العلم

هام بخصوص حملة اعرف فصيلتك السبت مايو 21, 2011 12:13 am

Ahmad Aly
السلام عليكم و رحمة الله و بركاته

ان شاء الله يوم الاحد 10 ابريل " غدا " تبدأ حملة اعرف فصيلتك .. و لاهميتها الشديدة حابب اؤكد على عدة نقاط كونها التفاعل الاول المباشر مع الطلبة .. و بالتالى نريد ان نفوز بالانطباع الاول لانه مهم جدا ..

1- مقابلة الناس : عايزين يكون بشكل راقى و باسلوب جميل و بابتسامة .. شكل يعبر عننا .. و عايزين نكون هادئيين جدا فى التعامل مع الناس و لا ننساق لاى محاولة اثارة مشكلة او استفزاز .. نستحمل الناس و اسئلتهم .. و فى حالة وجود اى مشكلة مانو هيبقى موجود للتعامل معها ..

2- المظهر : المظهر يعبر عننا .. علشان كده عايزين الناس اللى هتبقى موجودة تبقى لابسة البالطو و يكون نظيف و فى نفس الوقت ميكونش فى حد بياكل او بيشرب جوه فى المكان اللى بيتاخد فيه العينات .. الطربيزات ميكونش عليها غير الادوات اللى بنشتغل بيها

3- الاحترفية : مهم اوى اننا نثق فى قدراتنا .. و ناخد وقتنا فى التحليل للتاكد من النتيجة .. و مش عايزيين نحسس الناس اننا بنتعلم فيهم .. او بنجرب فيهم .. كمان فى حالة وجود اسئلة منرتبكش .. و نجاوب على الاسئلة بصورة هادئة و نجهز نفسنا للاسئلة و نحضر لها من النهاردة .. و يا ريت الناس تقرا الموضوع اللى قلنا عليهم فى المنتدى .

4- توثيق الحملة : و ده شىء مهم اوى .. من خلال تصوير صور للمكان و البانر و للناس اللى مشاركة .. و تصوير احد الشباب و هو بيعرف فصيلته و وقت اخد العينة .. انا عارف ان فى بنات مش هتبقى حابة فكرة تصويرهم .. علشان كده التصوير مش هيبقى مفاجىء .. هيتقالهم قبلها ان فى تصوير .. و اى حد مش حابب يتصور .. لن يتم تصويره .. لكن توثيق الحملة بالصور مهم جدا و خصوصا لاعلان ده على صفحة ثورة العلم .. لان ناس كتير فكرت ان الصفحة متوقفة لعدم انزالنا اى صور او معلومات جديدة عن شغلنا ... و بشكل عام اللى هيصور هيكون شخص يتمتع بالثقة

يبقى ان اؤكد مرة اخيرة ان نجاح الحملة بكرة من نجاح رابطة ثورة العلم .. و ان الانطباع الاول يدوم فلنفوز به و نكسب احترام الناس اللى هتتواجد .. نكون هادئيين جدا الى درجة البرود ..
و نراعى تعاملنا مع بعض كمان لان ده مهم اوى

يبقى ان اتمنى لى و لكم التوفيق
و السلام عليكم و رحمة الله و بركاته

رد: هام بخصوص حملة اعرف فصيلتك السبت مايو 21, 2011 12:26 am

Asmaa Fathy
كل ده مظبوط وجميل جدا انشاله هنحاول بقدر الامكان نكون فى احسن صورة وربنا يعينا ويساعدنا يارب

Heba Salam
عندك حق فى كل كلامك بكره اول تعامل مباشر مع الناس وهيخدوا عننا اول انطباع الى هيستمر معاهم على طول

اتمنى من الناس كلهم اننا نتعامل بكل هدوء حسن المظهر اهم حاجه النظافه الترتيب الثقه مهما حصل منتلخبطش قدام الناس كلنا هنساعد بعض والى ينسى حاجه يسال التانى المهم ان الناس تثق فينا

نقطه تانيه يا ريت كلنا وانا كمان نلتزم بموعدنا يعنى كل واحد يجى فى الوقت الى هو قال عليه

نقطه تالته ان العمل الى احنا هنعمله ده اول شىء فهو لوجه الله عزل وجل قبل اى حاجه يمكن فى يوم شخص يكون فى امس الحاجه لدم و الى بنعمله ده هو الى يساعده
هدفنا الاول وجه الله وبعد كده تأتى الاهداف الاخر

اخر حاجه عايزه اقولها ربنا يوفقنا كلنا بأذن الله ونقدر نعمل حاجه تضاف فى سجل رابطه ثوره العلم

بالتوفيق باذن الله وربنا معانا ويوفقنا

Heba Salam
انا عملت المعلقه الى ان شاء الله هتتعلق بكره وان شاء الله تعجبكم

Noura Fathy
جميل جدا وان شاء الله الامور تبقى تمام والحمله تنجح بالتوفيق ان شاءالله

Ahmedd Mohamed
متنساش تجيب ال ID معاك بكره

Mohammed Orochimano
الاي ديهات جاهزة وشكلها هيعجبكم ان شاء الله

ونزلت خلصت لوحتين واحدة عليها اسم الرابطة والثانية عليها اسم الحملة

والورق خلص بتاع التوعية وفصائل الدم ... اختصرت فيه وخليته جدول افضل ... يارب يعجبكم التنسيق اللي فيه بقي شكله جميل وخفيف

الطبيب في الوحدة العلاجية هيكون معانا ان شاء الله وهيتولي سحب عينات الدم واحنا هنحلل ونقوم ببقية ادوارنا كاملة

بالنسبة لبكرة دا الجدول حسب ما تم ملئه بنفسكم

من 10-11
هبة سالم - علياء سعد - احمد محمد - احمد سعيد - اسامة علاء- مهند - مانو

من 11-12
هبة حجازي - علياء سعد - هبة عطية -احمد سعيد - اسامة علاء- مهند - مانو

من 12-1
هبةحجازي - هبة عطية - احمد سعيد - اسامة علاء- مهند - مانو

من 1-2
هبة حجازي - لوليتا - احمد سعيد - اسامة علاء- مهند - مانو

اي حد يخلص محاضراته يا شباب يحصلنا علي مكاننا ان شاء الله قدام الكلية
بحيث لو مكنش حد كتب اسمه معايا في الورقة يبقي حاضر وموجود برضه علشان نظهر بمظهر كويس لاننا محتاجين كلنا نظهر بشكل مترابط

واعرفوا ان كل واحد فينا واجهة للرابطة واقل التصرفات هتنحسب علينا ... وانا واثق انكم هتكونوا قد الحدث ان شاء الله واعلي منه

وان شاء الله موفقين دايما وربنا يجعله في ميزان حسناتنا جميعا

Ahmedd Mohamed
آمين ومجهود تشكر عليه

Mohammed Orochimano
والله انتم اللي جميعا تستاهلوا كل شكر
ربنا يحفظكم ويبارك فيكم ويكرمكم

Ahmad Aly
و فى نور قالت انها هتبقى موجودة الساعة 1

Mohammed Orochimano
تمام وكمان من2-3
هيكون اغلب الشباب والبنات في نفس اليوم متواجدين

ونحط في اعتبارنا انه لو علي يوم الثلاثاء كان الاقبال اضعف ما يمكن فنخلي الثلاث هو نهاية الحملة بدلا من الاربع
ولو في اقبال يبقي احنا مكملين زي ما احنا

Ahmad Aly
عجبانى الروح اللى موجودة .. و متفائل جدا بالحملة .. و بالتوفيق ان شاء اله

Heba Hegazy
اوووووك معاكم بكره ان شاء الله ....وكويس جدا ان فيه طبيب هيكون معانا
بالتـــــــــــــــــــــوفيـــــــــــــــق
^___^

Albrins Ahmed
حلوه الروح دي ربنا يوفقنا جميعا
بس أحب انبه على حاجه

أن احنا مش حناخد عينة من حد خالص

لأن الدكتور هو اللي حيقوم بعملية أخذ العينة وأحنا حنقوم بعمل التحاليل الازمة بعد كده

وشكرا .....

Manar Habib
الورق منسق بطريقه جميله .. يبدو انه كان يوم مزدحم وصلت بعد انتهاء اليوم , ان شاء الله بكره هكون معاكم طوووول اليوم
وربنا يوفقنا والايام الجايه تمر بسلام ..

Heba Hegazy
ايون اليوم كان جميــــل اوى...وكان فيه اقبال كويس جدا
محتاج تنظيم اكتر ....
القطن والكحول او اى ماده معقمه ديتول مثلا ضروووى جدا (الناس طالعه من معامل)
وايدهم مش نظيفه ^_^
الابر الملونه كانت افضل من اللى جت بعد ما الابر خلصت.ومحتاجين وفره فى الشرايح
دى الملاحظات
_________________________
معاكم بكره ان شاء الله حسب الجدول
لكن كان مفروض اكون موجوده بدايه من 11 ل 12 والى نهاية اليوم
فانا بعتذر وهكون موجوده من 12 ......
نزلى محاضره اضافى من 10 ل 12 وفيه مشكله مع الدكتور
فمش هقدر اكنسلها
بالتــــــــــــــوفيق
^____^

Noura Fathy
جميل جدا بجد حاجه جميله ومجهود عظيم حابه اشكر كل البنات اللى تعبوا من الاول للاسف لحقتهم فى الاخر بس بصراحه مجهود عظيم وكمان الاولاد تعبوا جامد ربنا يبارك فيكم وان شاء الله بكرة نلاقى اقبال اكبر ونجاح اكبر بالتوفيق يارب وجزاكم الله كل خير

Lolo Lola
يوم جميييييل جدا..ومجهود ومشاركة رائعة من الكل وان شاء الله معاكم يوم التلات ونكرر اليوم الجميل دا وان شاء الله نلاقى اقبال اكبر وتفاعل من كل لطلبة معانا زى ما حصل النهاردة ولحد نهاية الحملة ..ويااااااااااااارب تكون الطلبة اخدت انطباع مرضى وجميل عننا وحسيت دا من الاقبال اللى شفناه النهاردة ما شاء الله ودايما برفع شعار...تفائل ما دمت تحيا

Mohammed Orochimano
السلام عليكم ورحمة الله وبركاته
بصراحة يوم اكتر من رائع
عارف انكم تعبتم كتير والله ومش عارف اشكركم قد اية
الروح كانت جميلة والكل بذل ما في وسعه علشان يخرج الحدث بصورة مشرفة
حابب اعتذر عن تأخرنا حتي 11 ونص للبدء في الحملة ... كنا بنجيب الورق وشوية دبابيس ومطويات علشان نوزعها علي الناس اللي اول مرة يسمعوا عننا
لكن الحمد لله لما بدأ الشغل الكل بدأ بنشاط وحماس

بالنسبة للشباب بعد ما كلمناهم اقتنعوا بالحملة والكل دخل علشان يشوف فصيلته
كمان كانت حاجة جديدة عليهم انه كل واحد عرف فصيلته وجاي يمشي نقوله استني خد نتيجتك من اخر الطرابيزة ... يروح ويشوف الورق وبقية الشباب يتكلموا معاه

بالنسبة للبنات عايز اعرف انطباعات الناس عن الحملة في يومها الاول
اراء الناس فيكم اية واخبار مستوي الاحترافية عامل اية ... هل اختلفتم في نتائج او حاجة ؟
هل كان في مواقف مش كويسة من الناس اللي عايزين يحللوا دمهم او اي شئ من هذا القبيل ؟
اي حاجة يمكن تلافيها بكرة يا ريت نعرفها من النهاردة
لاني اعتقد كنا محتاجين شوية تنظيم زيادة عن اللي حصل لانه كان الكل بيدخل يتشكشك قبل ما اللي بيحلل يخلص اللي في ايده ... فنراعي انه اللي هيشك الناس يتاكد انه في شخص فاضي للتحليل بدل ما يكون في تعطيل مثلا او حاجة

كمان في صحفي شغال مع عدة جرائد الكترونية متنوعة اسمه طه عبد الرحمن
كان فايت في الكلية بالصدفة ووقف معانا وكلمناه سريعا علي الحملة ونشاطنا بصورة مبسطة
اجري حديث سريع واخذ لنا صورتين جنب اللوحة وقال هينزل موضوع مخصوص عن الحملة في جرائد مثل اليوم السابع علي الانترنت لكن لسة مش عارف الوقت امتي تحديدا
واخذنا رقمه وان شاء الله هيغطي اغلب حملاتنا
الراجل كان مبهور بانه شباب صغير في السن وشغال يفي مجال النهضة العلمية ... وانبسط اكتر انه في استفادة عملية من مايتم دراسته في الكلية وانه تم تطبيقه في الحملة والجديد فيها انه القائم بيها طلاب كلهم من الكلية وليس احد من الخارج زي اغلب الحملات اللي بتتعمل

موفقين ان شاء الله دايما يا شباب ويا بنات ويا رب بكرة نواصل بنفس الوتيرة

Heba Hegazy
انطباع الناس عن الحمله جمـــــــيل جدا ....واكتر حاجه بسطتهم الورق اللى بتوزع بعد معرفة الفصيله...والمأكولات وكدا..وسمعت كتير بارك الله فيكم ...جزاكم الله خيرا
او انتوا تبع ايه ...فى طب ؟؟؟ تمريض؟؟؟ اتقالت كتييييييير اوى...
قلتلهم ادربنا ومعانا دكتور من عيادة الكليه

تنويه بسيط (بالنسبه ل anti B
نتيجته مش بتظهر الا بعد شويه فياريت نستنى عشان نتأكد كويس من حدوث تخثر للدم معاه او لا...وعلى اساسه اعتقد فيه نتيجه واحده غلط ...البنت استعجلت ولقيت الدم تخثر بعدها
@_@

الانطباع اللى مش كويس واحده قالت التحليل دا مش دقيق ....كلنا عاملينه فى المعمل وطلعنا كلنا AB
مسبتهاش طبعا ههههه فهمتها بيتعمل ازاى براحه ووريتها نتيجتها ...لحد ما اقتنعت
وكذلك مع اى واحده قالتى ازاااااى انا مش الفصيله دى
(او انا مش عاوزه الفصيله دى ههههه) طب اعمل ايه !!!....

كنا محتاجين تنظيم اكتر ده صح جدا ..حتى مش بشوف التجلط كويس عشان الضوووء والناس واقفه......طلبت منهم التنظيم اكثر من مره بس مفيش فايده

التعقيم بيدى اطمئنان جاااااامد عند الناس حتى بعد ما الديتول خلص فيه ناس هاتستنى لبكره لحد ما يتوافر التعقيم....كذلك فتح الابره ادامهم

_______________________________________
بالتوفيق ان شاء الله فى الايام الجايه

Lolo Lola
زى ما قالت هبة بالظبط والاجمل من كدا كمان ان فيه بنات بعد ما عرفت فصيلة دمها وكدة لقيتهم بعد شوية جايين ومعاهم زمايلهم كتيييير وكانوا مبسوطين من اللى احنا بنعمله والجو كان كله هزار ومرح بينا وبين البنات حتى التعليقات اللى اتقالت ردينا عليها والبنات تفهمت دا واقتنعت زى ما قالت هبة ...على فكرة يا جماعة نور جربت فيا الاختبار النهاردة مع انى عملته بس صممت تجربه تانى فيا.وما شاء الله عليها مش حسيت بالابرة خاااااااااااااااااااااااالص ةلا وجعتنى ولا اىىىى حاجة واوعى حد يقولها بقى ههههههههههههه....واكتر سؤال سمعته انتو تبع ايه ؟؟ وكان الرد جاهز طبعا وفورااا متبوعا بالمطوية ههههههههه

واللى اجمع عليه معظم الردود اللى فاتت هو التنظيم واننا كنا محتاجين تنظيم اكتر وهدووووء اكتر

Mohammed Orochimano
تمام يا بنات
بيقي مش هوصيكم
ديتول وكيس قطن للبنات
اما الشباب كفاية عليهم كيس قطن ^_^

التنظيم برضه مهم
خلوا جزء من البنات ينظم وجزء يتكلم وجزء يحلل زي ما كنا عاملين
شوية للتحليل وشوية لتسجيل الاسماء والشرح وشوية لجذب الطلاب
وما تستعجلوش يا بنات وما تخلوش حد يقولكم شكشكوني قبل ما تخلصوا العينات اللي معاكم
الشباب النهاردة برضه نبهتهم لنفس النقطة والحمد لله ضبطوا النظام
بكرة لو في حاجة زي كدا تاني حصلت عرفونا علشان ما يحصلش استعجال تاني

Noura Fathy
السلام عليكم
بالنسبة للابر فحاضر ان شاء الله هنجبها ملونه لان فعلا البنات خايفة من الابر التانيه وهنبقى نعطى التانيه للاولاد ديمقراطيه بقى^_^
بالنسبة للشرائح ان شاء الله بكرة هتبقى متواجده وبوافره وان شاء الله هنهتم اكثر بتنظيم المكان ونظافته واى حد جاى من المعمل هيغسل ايده ويلبس الجواندى عشان الكل يبقى مطمن

بالنسبة لانطباع الناس فالناس كانت مبسوطه جدا اى نعم فى ناس كانت خايفة من الشك بس الحمد لله طمناها وفى ناس لما نتجتها طلعت سالب خافت ورجعت تانى تسال طيب انا اخد من مين واعطى لمين والحمد لله ردينا عليها وفهمناها والناس مبسوطه جدا من الورق اللى بيتوزع انا خدته بس ملحقتش اقرائه اتاخد منى وان شاء الله بكرة هنحاول يبقى فى تنظيم اكتر وفعلا زى ماهبه قالت انتى بى بياخد وقت شويه على مبيظهر نتيجته فمش نرمى الشرائح علطول اما بالنسبة للنتائج فلما كنا بنبقى مش متاكدين كنا بنتاكد من بعض وطبعا كان فى شغل وجوده الحمد لله وفعلا يوم كان جميل كان نفسى اتواجد من بدايته بس ربنا يبارك فى البنات اللى كانت موجوده بصراحه تعبوا واجتهدوا وروح كانت جميله جدا بالتوفيق يارب فى الايام القادمه

معلش بقى يالولو كنت عايزة اجرب فى حد وعايزة اشتغل جت فيكى بقى ولو مجبتلوش حد بكرة هجرب فيكم تانى انتوا حرين ^_^
بجد انا لحد دلوقتى سعيده بالروح الجميله دى ربنا يبارك فيكم ويارب يفضل بينا الروح الجميله دى...

Manar Habib
الصحفى صاحب الصدفه .. بشرى خير ^__^
بالنسبه للتعليمات اللى حضراتكم قولتوها .. علمت وتنفذ ان شاء الله
الانتظار بعد اضافه الانتى بى + مزيد من التنظيم = عمل مثمر

Mohammed Orochimano
الصحفي برضه شكله عرق الصحافة تغلب عليه ومش ذكر كل حاجة قلناها ^_^
جايز علشان كان بيكتب بسرعة ولا اية مش عارف

هو نشر لنا فعلا علي جريدة اليوم السابع
بس نشره علي انه خبر تأسيس اكثر منه حملة

http://www.youm7.com/News.asp?NewsID=388291&SecID=296&IssueID=0

Noura Fathy
واضح ان الامر اختلط عليه وفهم الكلام غلط
هو الموضوع حلو بس لو كان ظبطه اكتر من كدا وكمان كلمه تأسيس دى
بس يلا حصل خير شكل فعلا عرق الصحافه غلب عليه وهو بيكتب^_^

Lolo Lola
الله ..فرحت اوووى بالموضوع دا ..هو كان محتاج شوية تظبيطات منه كدة على محتوى الموضوع بس تمام كدة وبداية مبشرة جدااااااااااااااااااا...والله كلو هيبقى تمام ان شاء الله وهنحقق كل اللى نفسنا فيه...فعلا بشرى خير
^-^

Asmaa Fathy
معلش جيت متأخر بس الموضوع كان اكتر من رائع بجد كان جميل اوى بس كنا عايزين تنظيم مثلا كلنا واقفين ع الطربيزة واحدة تشك وواحدة تعمل anti وواحدة تسجل وواحدة تكلمها وهاكذا عشان بس ننحسسهم ان اللمر عادى والاهم من كده كحول انشاله نشتريه بكرة مع الابر واشتريت 300 شريحة ولو عايزين اكتر اقولو

Mohammed Orochimano
ربنا يوفقنا بكرة كمان ان شاء الله

بالنسبة لبكرة الحضور كالتالي

من 10-11
منار - نهلة - اسماء - باسنت - احمد سعيد - مانو

من 11-12
منار- نهلة - اسماء - هبة - احمد سعيد - مهند - مانو

من 12-1
منار - هبة- نهلة - اسماء - هبة - احمد محمد - احمد سعيد - مهند - مانو

من 1-2
منار - هبه - نهلة - اسماء - هبة - ولاء- احمد سعيد - احمد محمد - مهند - مانو

من 2-3
منار - نهله - هبة- اسماء - روميساء - باسنت - ولاء - احمد محمد - احمد سعيد - مهند - مانو

وفي شباب برضه هيحضروا معانا ان شاء الله بس مش كتبوا اسمائهم في المواعيد
وكذلك اي حد من الجروب يخلص محاضراته ومش كتب اسمه في الورقة ينزل معانا تحت
احنا هنكون قدام البوابة الفامية بالضبط ان شاء الله في مكاننا اللي كنا فيه النهاردة

اشوفكم ان شاء الله من 9 ونص علشان نلحق نفرش الحاجة ونجهز المكان سريعا طبعا علشان نبدأ 10 ان شاء الله

Noura Fathy
طيب اسمى فين ؟؟؟
خلاص توكلت على الله مش هجبلكم حاجه ابقوا دوروا عليا بقى
ههرب بالحاجه اللى هجبها ^_^

Ahmad Aly
الف مبروك لنجاح اليوم الاول من الحملة .. مجهود رائع باشكركم عليه جدا .. كان نفسى اكون معاكم من اول اليوم بس معلش ظروف الشغل .. بس فى الوقت اللى كنت موجود لمست الروح الرائعة اللى كانت موجودة .. و المجهود الكبير اللى كان مبذول من الناس كلها .. فحابب اشكركم جدا على ادائكم و على نجاح اليوم الاول .. و ده يحطنا تحت التزام اننا نكمل بنفس الشكل و النجاح .. و افضل كمان

كان فى ملاحظات نحاول نتلافاها بكرة ..
1- ان التنظيم يزيد شوية .. و ده ان شاء الله يتحسن بكرة .. و شىء طبيعى فى اليوم الاول ..
2- البنات كانوا اكثر التزاما بالبالطو .. يا ريت الشباب بكرة يكون لابس بلاطى .. لان ده بيفرق فى الشكل العام
3- الديتول ان شاء الله هيكون موجود بكرة .. و القطن كمان

* بالنسبة للصحفى .. شىء جميل جدا .. ان ينزل خبر باسم الرابطة .. ده فى حد ذاته شىء يفرحنا .. اما بالنسبة ان موضحش فكرنا اوى .. فده يورينا اننا لازم نشتغل اوى علشان نوصل فكرنا و اهدافنا .. لكن بداية موفقة

* الاسماء اللى موجودة دى اللى مع محمد .. لكن اى حد مش مكتوب اسمه طبعا معانا عادى جدا .. و اى حد يخلص محاضراته يتواجد معانا .. " " ماشى يا نورا " .. معاها الحاجة بقى

بالتوفيق ان شاء الله .. و من نجاح لنجاح

Ahmad Aly
أمانة واجب توصيلها :
هشام فتحى بيسلم عليكم كلكم .. و بيقولكم الف شكر على المجهود الكبير و .. و بيبارك لكم على نجاح اليوم الاول .. و الظهور بشكل جميل .. و بانه معاكم بقلبه و كان يتمنى لو كان بينكم .. و بيتمنالكم التوفيق فى بقية الحملة .. و ان شاء الله من نجاح لنجاح و بالتوفيق دايما

Mohand Fatahalla
انا جاى ابارك لكل من ساهم فى النجاح فى اليوم الثانى على التوالى وبجد كان الشغل جامد جدا .
بس انا ليا كام تعليق كده على طريقة عملنا كروح واحدة:
1- ازاى نبقى ايد واحده ونزعل من بعض عشان مين اشتغل اكتر من التانى؟
2- التنظيم كان مش تمام خالص وياريت نحاول نظبطه شويه عشان منظرنا قدام الناس كلها يبقى منظر متحضر وراقى.
3- عاوزين نلف فى الكلية ونجيب ناس مش لازم اللى يعدى هو اللى يجى احنا لازم نوزع نفسنا واكيد كل واحد فاهم نفسه .
طلب صغيوووووووووووور : بكره باذن الله عاوزين اى حد يقدر يجى بدرى يجى احنا هنكون موجودين من الساعه 10.30 باذن الله....
وفى الختام انا بشكركم كلكم على مجهودكم ووقتكم وبتمنى الروح الطيبة تسود معاملاتنا وننسى كلمة ال (أنا) .ماشى يا شباب ماشى يا بنات

Albrins Ahmed
أنا بضم رأيي لرأيك يا مهند

لازم نكون أيد واحدة وروح واحدة مش عاوز حد يزعل من حد او يتنرفز

لأن احنا عاوزين نطلع بصورة حلوة قدام الناس
وغير كده أحنا جروب واحد

وفي نفس الوقت بأشكر البنات والأولا على المجهود اللي بذلوه أنهارده

عندي ملاااااحظة صغيرة

ياريت ياجماعة نحافظ على المحاليل شوية لأن زي ما أنتم شايفين كان في اهدار شوية ووقع كتير منها وأنتم عارفين المحاليل غالية شوية

وربنا يوفقنا ان شاء الله في اليومين اللي فاضلين وأرجع وأقول احنا ( فـــــــريق واحــــــد )

إلى الأمام أن شاء الله

Heba Hegazy
الحمد لله اليوم التانى كان جميل جدا وناجح برضه....وكان متوقع النهارده العدد يكون اقل
عشان ناس كتير عندها رست ...بس ما شاء الله الاقبال كان كويس جدا
وكنت سعيده لما سمعت تعليقات البنات انهم استفادوا ...وفيه بنات كتير جت امبارح وجابت اصحابها انهارده

كان فيه تنظيم فى الشغل عن اليوم الاول ...بس برضه محتاجين تنظيم اكتر
اتفق مع مهند واحمد...احنا فريق واحد ...

ليا ملاحظتين
الاولى وصلت من زميله...هى عارفه فصيلتها قبل كده...ومش عايزه تعمل التحليل تانى
طلبت الورقتين اللى بيتوزعوا ...واللى بتوزع مش اديتها الا واحده منهم بالعافيه
طيـــــــب ليه ؟؟؟ احنا هدفها نفيد ......مش نحلل للناس غصب عنهم
بكره ياريت تأكدوا للى بيوزع او بتوزع على النقطه دى

الملاحظه الثانيه :
الكشوفات اللى بتكتب فيها ((((الطلبه اللى عندها استعداد تتبرع مستقبلا ))) ان شاء الله
انهارده ليه محدش بيقولهم هدف الكتابه ورقم التليفون ليه؟؟؟ لااااازم تتقال....وحاولت اوضح ده بقدر الامكان للطلبه اول ما جيت
واللى عايز فقـــــــــــــط هو اللى يتكتب اسمه
امبارح كان فيه اقبال اكتر بس كنا بنكتب اسم اللى عايز بس........انهارده الاسماء كلها كانت بتتاخد !! مينفعش ...لازم الناس تكون على علم

وكموقف حصل مترتب على كده كان فيه تعليق سخيـــــــف جـــــــــدا من طالبه
واقفه ادامنا لا مش عايزه اعمل يا حبايبى....افرضوا خدتوا الاسماء للدكتور ويسقطنا
معرفش بتتكلم ازاى وعلى اى اساس....وكملت كلام على النمط ده
لكن اسماء زميلتنا ردت بطريقه كويسه ومش زعلتها (مع انها تستاهل بقه حد يزعلها )....
____________________________________________
بالتوفيق ان شاء الله فى اليوم الثالث
كنت اتمنى اكون موجوده..هاخلص على 2 واجى ان شاء الله اساعد لو محتاجين
^___^

Asmaa Fathy
اليوم الحمد لله كان كويس اوى بس كنا عايزين نكون ايد واحدة حتى قدام الناس على الاقل ونحلول باذن الله نكون مع بعض وايد واحدة ومش عايزين يا جماعة اى حد يزعل من بعضة احنا بنشتغل شغل كويس اوى وعمل حلو ما شاء الله يبقى مفيش داعى للكلام ده وفكرة ان احنا لازم نعرف الناس على انهم يتبرعو لو قلنالهم محدش هيرضى يسجل اسمهاوى واحنا كده مش بنكذب عليهم مش جايز يكونو همة اللى محتاجين حد يعطيهم يعنى تقريبا الامر عادى وربنا يوفقنا بكرة انشاله

Asmaa Fathy
انا اشتريت اربع علب شرائح وباذن الله عندى محاضرات فى مدرج 2 من 8 الصبح وعندى الساعة 10 ريست او قبل 10 بشوية وهكون فى المدرج و لو حد فاضى معلش ممكن يجى يخدهم لان عندنا محاضرة 10 وربع ولو انتو هتبقو موجودين ف مكان الحملة الساعة 10ممكن اجى اعطيهلكم

Mohand Fatahalla
باذن الله هحاول انزل بدرى شوية واخدهم منك يا اسماء لان ميعادنا كان على 10.30 او 11 وباذن الله تقدروا تبقوا معانا فى نهاية اليوم...

Mady Sharkawy
الف مبرووووك يا شباب على نجاح الحمله والرابطه فى اليوم الاول والتانى ومن نجاح لنجاح ان شاء الله وربنا يبارك فيكم ويجزيكم خير على المجهود اللى بذلتوه وشكرا للخريجين اللى بينزلوا مخصوص وشكرا لكل اللى ضحى بمحاضره او اى شىء علشان يبقى موجود ويساعد
وانت يا مانو ؟؟؟؟مش بتكتب اسمى فى اللى هيحضروا ليه؟انا مش كتبت اسمى فى الورقه علشان ببقى موجود طول النهار فااااااضى بقى هههه
وانت يا هشام واحشنى جداوفى بالى امبارح والنهارده كان نفسى تبقى موجود يا صحبى بس ياللا الدفاع عن الوطن عذر مقبووول ربنا يرجعك بالسلامه
ومش هقول سلبيات ومش هتكلم عن الخبر اللى فى اليوم السابع هقوول بس
ان الله لا يضيع اجر من احسن عملا

Mohammed Orochimano
السلام عليكم ورحمة الله وبركاته
مبروك يا شباب علي النجاح الساحق دا واللي بيثبت اخلاصكم وجديتكم باستمرار
ربنا يوفقنا دايما ونكون افضل وافضل

بالنسبة للسبليات اللي حصلت يا ريت نبقي اكثر تفاهم مع بعضنا البعض وناخد بالنا انه الاسلوب اكيد بيفرق واحنا كلنا اخوات مش مستاهلة نزعل بعض لاي سبب من الاسباب
وبكرة ان شاء الله هنراعي دا اكتر من كدا

ويا بنات خلاص محدش يشتري اي ادوات او اي حاجات
احنا جبنا السلايدات والابر وبسعر رخيص كدا تقريبا بنصف السعر لانه بنجيب من مكان بالجملة

ربنا يبارك فيكم جميعا وان شاء الله من تقدم لافضل

انتقل الى:

صلاحيات هذا المنتدى:

لاتستطيع الرد على المواضيع في هذا المنتدى

اهلا بك يا زائر لديك 16777214 مساهمة

هام بخصوص حملة اعرف فصيلتك

descriptionهام بخصوص حملة اعرف فصيلتك السبت مايو 21, 2011 12:13 am

descriptionرد: هام بخصوص حملة اعرف فصيلتك السبت مايو 21, 2011 12:26 am

هام بخصوص حملة اعرف فصيلتك السبت مايو 21, 2011 12:13 am

رد: هام بخصوص حملة اعرف فصيلتك السبت مايو 21, 2011 12:26 am