سري للغاية .. انا واصل إذا انا موجود

سري للغاية .. انا واصل إذا انا موجودالسبت يوليو 05, 2008 4:17 am

تذكير بمساهمة فاتح الموضوع :

علي فكرة يا جماعة الموضوع ده مستمر
وانا كل يومين تقريبا بنزل موضوع جديد علي هيئة رد
وشكرا لكل من يهمه الأمر

في البداية أحب أقولكم إني كل اللي انا هقوله ده مجاليش الجرأة إني أقوله غير لما اتأكدت إننا في بلد قال إيه ديموقراااااااااااطي ( دستور يا أخوانا يا بُعده لأ سوري دستور من البُعده )

[ندعوك للتسجيل في المنتدى أو التعريف بنفسك لمعاينة هذه الصورة]برجاء الضغط علي الصورة للتكبير

بالله عليك لما تبقى أنتا ولا غيرك مش لاقي اللقمة تاكلها وييجوا ولاد ....... ( ........... اتحذفت عشان الرقابة ............ )( دي على فكرة مكنتش شتيمة دا كان مدح بس اتشال علشان الحق حق مفيش مسئول في مصر المفروض يتمدح )

لما تكون مش لاقي تاكل ( مش لازم انتا يعني يكون حد تعرفه )وييجوا اللي ربنا يعينهم يا خدوا الرز بتاعك اللي المفروض إن انتا يا حبة عيني تاكله وتتقوت بيه انتا وشعبك ويصدروه لأحفاد القردة والخنازير .. بيصدروه للناس ( قصدي لل ........ ) اللي سرقوا أرضنا وهتكوا عرضنا واستحلوا نسائنا وشردوا أطفالنا وحرقوا بيوتنا و .. و .. و ... ( ولا إحنا مش عرب والفلسطينين دول أخواتنا برضو ؟؟ ) (سلم يا رب سلم )

بتصدروه لإسرائيل ؟؟؟

إسرائيييييييييييييييييييييييييييييل ؟؟؟؟؟؟؟؟؟؟؟؟؟؟

طيب ما تبعتوه لحد عدل .. لحد مقدرك .. انتا لما تحب تجامل واحد بتجامل اللي يقدرك .. مش اللي هانك مرة واتنين وعشرة

[ندعوك للتسجيل في المنتدى أو التعريف بنفسك لمعاينة هذه الصورة]برجاء الضغط علي الصورة للتكبير

بس الصراحة الاستجابة لطلبات الشعب كانت وقتي في التو واللحظة

قرار رئاسي ( فرمان من السلطان ) وقف تصدير الرز لإسرائيل ( إفقع زغروطة يلااااااااااااااا ) علشان الرز غالي ومش لاقيينه

بس كدة الرز بقة مالي السوق خلاص والاتنين بجني ( الاتنين كيلو بجنيه )

ودا على أساس إننا شعب غلبان ؟؟ ولا شعب بيستهبل ؟؟ ولا شعب إيه بالظبط ؟؟

وطبعا أحباب الحزب كتير ماشيين في الشارع بالعربيات الرز رجع الرز رجع علي أساس إن الرز فك زي الأسد بتاع أحمد حلمي في فيلم رحلة حب

( الأسد فك الأسد فك )

أكثر ما تحتاجه مصر الآن هو التطرف.. ليس التطرف الديني الأحمق الذي يعبر عن تعصب جهول وعن جهل متعصب.

لكن مصر تحتاج بشكل عاجل وعميق لبعض التطرف، نعم تطرف أولادها من المثقفين والسياسيين أصحاب الضمائر، تطرفهم في التمرد علي الأفكار البالية، علي التمسح في السلطة، علي الرضوخ لقمع الحكم وقهر السلطة سواء هذا القمع الخشن أو الناعم، القهر الصاخب أو الهادئ الذي يتغلغل في وجدان المصريين فيجعل بعضهم مخبرين ومرشدين عند الحكام أو أذرعًا لهم تبطش وتطيش أو عونا لهم علي إخوانهم، أو مسالمين مستسلمين معاكم معاكم، عليكم عليكم،

وفي الآخر نقول لحبايبنا الكبار الواصلين المتريشين المتظبطين المتروقين والمتكيفين نشاطركم الثروات

[center]محبوس حابس يا أسيادنا

وبكاكي من فوق مدنى

وورايا ديوك بيكاكوا

حرْصوا ع الباقى معاكوا

بركة مولانا هولاكو

حلت وعلينا اللعنة

طرطور طرطر طراطير

بيغيروا في الدساتير

ولا عاد في الحتة كبير

ويا وارث تورث مين؟؟ ما الورث إتباع واتباعنا

نرجع تاني لموضوعنا

وبيان لديار الإفتا

من جمهورية زفتى

لعبة وعملوها إستفتى

صوَت ياللي انتا سامعنا

للجوكر ألف تحية

ملعون خاشي الحرية

يحيى قانون العبودية

والأحكام العرفية

والقوانين الوضعية

لها مني ألف تحية

وحياة أمي دي رجعية

لو صوتنا علي وجعجعنا

واحد ومفيش غير هوا

قاعد متربع جوا

وبالعافية أو بالقوة

لو عامل فيها فتوة

روح قوله بقى يودعنا

مزيكا وتراباتووووو

ونفديك بالدم ... أفدوه

بس إحنا ورحمة أبوه

مين يقدر يلوي دراعنا ؟؟

حرصوا من لعب السيكا

م الحوكشة ومن البلوتيكا

ولا تشمت يوما فيكا

مارشيل بنت أم ماريكا

قول حاجة الله يهديكا

وأدعي معايا يخليكا

حلوا بقى عن أوجاعنا

وأنصرفوا عليكوا اللعنة

أنصرفوا عليكوا اللعنة

للموضوع بقية .. أنتظروني

عدل سابقا من قبل mido في الإثنين سبتمبر 15, 2008 1:44 pm عدل 16 مرات

الوهم الأكبر في مصرنا المحروتةالسبت أغسطس 02, 2008 11:33 am

أنا مستغرب إحباط الناس والجماعات والتيارات السياسية في مصر من حكم براءة ممدوح إسماعيل!
صحيح مستغرب جدًا، يعني لو كان القاضي حكم علي ممدوح إسماعيل بالحبس سنة أو اتنين في الحكم الابتدائي كنتم ارتحتم واعتبرتم هذا نصرًا وتصورتم أن هذا عدلاً وروحتم مبسوطين هانئين مهنئين أنفسكم.
ما هذه الخيبة؟
أساسًا الحكم بالحبس في الدرجة الأولي يمكن استدراكه في الثانية بل يمكن عدم تنفيذه من الأصل، فالرجل هارب ومسافر وقاعد في لندن ويدير أعماله القاهرية مستعينا بتكنولوجيا العصر والظهر والمغرب، والذي يريده ممدوح إسماعيل من إعلاميين أو صحفيين أو نواب يدعوهم للندن علي الرحب والسعة للتخطيط السياسي والتخريط الإعلامي، إذن الحكم علي ممدوح إسماعيل لا يعني أي شيء بالمرة ولا تفرق ولا تساوي مثقال حبة من خردل!.

ومن هنا أرجع بكم إلى المقولة الشهيرة بتاعة اللي نعرفه أحسن من اللي منعرفهوش
واحنا نعرف إن الريس علاقاته الخارجية زي الفل وزي العسل
طيب فين بقة يعني هوا لو أيمن نور فك .. مش الريس كان جابه من كوالالامبور ؟؟
بالنسبة للأستاذ اللي بيسأل عن ممدوح إسماعيل
الرد وصل ؟؟؟؟

وفي النهاية أحب أشكر كل الناس اللي بيحبوا الريس .. بس حقيقي فعلا بصراحة مصر كلها بتحبك يا ريس

[ندعوك للتسجيل في المنتدى أو التعريف بنفسك لمعاينة هذه الصورة]

أنتظروني والموضوع القادم
رثاء وطن .. وشعب لا يستحق أن يعيش فيه

رثاء وطن وشعب لا يستحق العيش فيهالإثنين أغسطس 04, 2008 2:18 am

رثاء وطن وشعب لا يستحق العيش فيه

مقالة للأستاذ سعيد سلامة

مخزون الغضب فى النفوس زاد وفاض ، واليأس طغى فيها على الأمل ، فأحوال مصر والمصريين لا تبشر بخير وإنما تنذر بخطر عظيم . كل طبقات الشعب غير راضية عن أحوالها . ولا شك أن كلنا يشعر بما أشعر به ، أننا نعاند أنفسنا ، نضيق بأى شيء وبكل شيء. كلنا مرضى نعرف الداء ونتمنع على الدواء . نعم ... الحكومة طرف فيما نعانيه ونحن أيضا طرف ، ومن عجب أن يتفق الطرفان على ما نحن فيه من فوضى واضطراب . وإليكم لمحات من أحوالنا ... مجرد غيض من فيض .
• رغيف الخبز " المدعم" عزيز المنال رغم ما يتمتع به من كآبة المنظر ، أما الرغيف الحر فسعره فى صعود وقريباً لن يقدر على أن يناله أحد .أسعار السلع تمضى قدماً لا تلتفت وراءها ، مختالة بنفسها رغم رداءتها وهُزالها .
• لم أكن أتصور أن تمتد يد الغش إلى عسل النحل بمضادات حيوية محظور استخدامها .
• الأدوية بلا مفعول . سألت أهل الطب والدواء فأمنوا على كلامى ونصحونى بشراء الدواء المستورد . أكياس الدم ملوثة ، المحاقن ملوثة .
• المياه المعدنية ليست بمعدنية ، فمنها ما يعبأ فى زجاجات سبق استخدامها بماء الله أعلم به .
• طعامنا وشرابنا وهواؤنا سبب البلاء والسقم الذين حلا بالناس .
• ثمار الفاكهة تقطف وتباع قبل أن تنضج . حتى البطيخ الذى ينتظره الغلابة كل حين لتطرية اللقمة وترطيب الجوف له طعم غريب . ما تنكسر واحدة حتى يمور نسيجها ويعبس لونها ويسوء مذاقها .
• محلات الكباب تبيع لحوم الكلاب والقطط و الحمير ، وما ينفق من طيور وحيوانات .
• وزير السياحة يهدد أحد أصحاب الفنادق الفخمة بتخفيض درجة فندقه إذا امتنع عن تقديم الخمور !!
• السرقات تتم نهارا بجرأة لا حد لها ، ولم تعد تقتصر على مال أو متاع ، بل وصلت إلى حد السطو على كلى و أكباد من يقع من ضحايا .
• النصب على خلق الله بوسائل مبتكرة لا يجد من يوقفه ، احتكار السلع الحيوية لا يجد من يتصدى له . جباية الأموال متصل إلى حد فرض ضريبة على الأنفاس .
• الاعتداء بكل أنواعه يمارس على الآباء والأمهات والأخوات .
• الإمتحانات أصبحت سلعة رائجة ، ويبدو أنها كانت تباع خلسة من يوم أن أذاعت إسرائيل فى الستينات امتحانات الثانوية العامة وأجوبتها النموذجية ، واليوم أصبح البيع فى العلن .
• استهتار بحياة البشر السائرين على الأقدام والراكبين براً وبحراً ، وربنا يستر على راكبى الهواء.
• البرلمان يضم تاجر فى المخدرات ومن استورد طناً من حبوب الفياجرا ... والباقى معروف.
• الكرة تستحوذ على كل الاهتمام ... وذلك بتوجيه من الحكومة .
• الناس فى الشوارع يسب بعضهم بعضا ، لا توقير لكبير ولا عطف على صغير ولا احترام لأى إنسان .
• المحاكم متخمة بقضايا الظلم ، والعدل بطيء . الأحزاب يمزق بعضها بعضا يتستر على كبائر الكبار ويفضح لمم الصغار .
• الصانع فقد ضميره ، والبائع فقد ضميره ، والمزارع فقد ضميره ، والعاملون لدى الحكومة فقدوا ضمائرهم ، لا يقضون مصلحة لأحد إلا بعد استنزافه مادياً ومعنوياً . القائمون على التعليم انحرفوا عن رسالتهم ... وأيضاً فقدوا ضمائرهم .

تعليقي
طبعا مفيش إختلاف إن رأي وكلام الأستاذ الكبير سعيد سلامة صحيح مية في المية
يعني زي ما تقولوا كدة مفيش حاجة في مصر سليمة غير مستشفيات الشرطة والقطاع الحربي
ومباني الوزارات والمؤسسات السياسية والدبلوماسية وطبعا نوادي الشرطة ونوادي ضباط القوات المسلحة ومش هننسى طبعا ديوان الجمهورية وطبعا الطريق اللي بيمشي فيه الريس والأستاذ جمال ووزراء الدولة الكرام وكبار مسئوليها
وطبعا مفيش أصلح من أكل الناس دي يعني لا مواد مسرطنه ولا كلاب سعرانة ولا كلام من ده
والناس دي طبعا مش بيجيلها أدوية مغشوشة محذورة دوليا
وطبعا الناس دي بتاكل عيش تخسيس من عند عم حسين بتاع الفرن البلدي
وطبعا الناس دي بتشرب مية معدنية بحق وحقيق
وبياكلوا لحمة كما أنزل مش لحمة كلاب وحمير
وطبعا بالصور الكلام ده في موضوع أكلتينا الحمير يا حكومة في منتدى الحوار العام
وطبعا الناس اللي زي دي عمرها ما تسرق ولا تنهب ولا تهبش
دي ناس مستريحة يا حاج

علشان انا اتخنقت انتظروني في موضوعي القادم
أخبار محلية

رد: سري للغاية .. انا واصل إذا انا موجودالإثنين أغسطس 04, 2008 2:06 pm

شكرا ياميدو ع الموضوع

رد: سري للغاية .. انا واصل إذا انا موجودالإثنين أغسطس 04, 2008 3:50 pm

أخبار محلية

صرح مصدر مسئول بوزارة الهواء الطلق والنعنشة العامه أنه سوف يتم تنزيل أو تحميل هواء على النت بالمجان لمحدودي الدخل على أساس إن محدودي الدخل هما اللي عندهم نت أو عندهم كمبيوترات أصلا

قامت تم الحذف*** بالتبرع بمبلغ مالي ضخم لصالح مستشفى الأطفال وذلك لأنها أعلنت توبتها وإتجاهها إلي غسيل الأموال

صرح الأستاذ (إقتصادنا في الاستكة)المسئول عن الاقتصاد القومي في دولة(فلوسك في جيوبنا) بأنه سوف يتم معاقبة كل من يتهرب من دفع الضريبة للدولة المبجلة ودا على أساس إن إعلانات عبيطة بتيجي على القناة السابعة والأربعين في قنوات الدولة المبجلة هتخلي الناس تدفع الضرايب ( خليك راجل مفوتر ) ولا عزاء للحرامية

قرر رئيس الدولة إعطاء المعونات المالية لجميع الوزراء والسفراء والمسئولين الكبار ولم يكتفي بذلك وإنما أمر بعلاجهم على نفقة الدولة وذلك بعد أن تناول السادة الكرام وجبة فول وطعمية وعيش بلدي عملهالهم طباخ الريس

حاول أحد المساجين الكبار أن يهرب من السجن .. مع أنه ليس في حاجة للهروب من السجن .. ولكنه بعد فشله .. فؤجيء بنفسه خارج الأسوار .. ولما سألته زوجته قال لها .. لقد شتمني الحارس ابن ال ..... وقال لي مش كفاية يا عبيط دخلوك السجن مش عارف تهرب من السجن كمان ؟؟ أمال ممدوح اللي غرق الناس وراح لندن ده نعمل فيه إيه ؟؟

وطبعا الحارس لم يكتفي بالشتيمة فقط .. وإنما دب صوابعه العشرة في جيوبي وأخرج ما كان معي من مال ودبه في جيبوبه .. وهذه ليست روشة .. وإنما هي بقشيش

تم وضع موظف تحت رقابة مشددة وتحويله إلي التحقيق ومصادرة الكام لحلوح اللي حيلته وذلك لأنهم ضبطوه وهو يشتري ربع كيلو لحمة مش مجمدة من عند عم رزق الجزار علشان ياكلها هوا وخمس عيال وأمهم وستهم

نشب حريق كبير في إحدي وحدات المطافي وقام الأهالي بمجهودات كبيرة لإطفاء الحريق ووضح البحث الجنائي ان سبب الحريق كان ماسا كهربائيا وقبل إنقاذ المصابين تم القبض على ماس وإغلاق محل الكهربائي المجوار

وفي طريق الإسعاف لإنقاذ ما يمكن إنقاذه تعطلت العربة ومات السائق لأنه كان عجوز قوى ومش بيشوف

رد: سري للغاية .. انا واصل إذا انا موجودالخميس أغسطس 14, 2008 10:55 pm

تحيا مصر لمبارك

النهاردة .. الساعة 10.30 الصبح
هبوط حاد في الدورة الدموية حصل لكورنيش إسكندرية
طيارات رايحة وطيارات جاية وأمن مركزي وحرس جمهوري ومخابرات وأسلحة دمار شامل وعسكر محاوطين إسكندرية
نص سكان المحروسة عساكر أمن مركزي .. تقريبا كل عساكر مديريات الأمن في مصر كانوا في إسكندرية النهاردة
طبعا مش علشان الوزير هنا ولا السفير هنا
دا علشان كان الريس بذات نفسيته في إسكندرية بيفسح السلطان قابوس المعظم
بتاع سلطنة عمان أكيد كلنا عارفينه
بس بأمانة ربنا السلطان قابوس مش بيتحرك من السلطنة غير لما يكون في مصالح مهمة
يعني النهاردة مكنش فيه هزار أو فسح
الحق يقال
بس حاجة كدة ع الهامش ( مكنش في داعي للطيارات )
بتمن البنزين كنتوا روحتوا اتفسحتوا بيهم في القلعة وكنت معاليك يا ريس تشوف الشعب أخباره إيه

أنا بقى عامل الموضوع ده بالذات علشان أتعايق بصراحة
حد فيكم يجرؤ يقرب من الريس أو من عربية الريس ؟؟
طبعا كله هيقولي لالالالالالالالالالا يا عم دا انا حتى محلمش أشوفها
انا بقى مش قربت من عربية الريس
دا انا سلمت على السلطان قابوس ذات نفسه صاجب الريس
اه والله العظيم سلمت عليه
ومش في الحلم .. في الحقيقة والله
عارفين إزاي ؟؟

والله اللي هقوله ده بيحصل يا ناس

السلطان قابوس راكب عربية لاند كروزر خضرا
ربع أناقة عربيات الرئيس مبارك
او يمكن أقل من الربع كمان

هوا اللي كان سايق والله العظيم هوا اللي كان سايق

وكان معدي من منطقة إسمها عبري في السلطنة
والناس لما عرفت انه جاي كله نزل يستقبله
الناس بتقف صفين وهوا يعدي يشاور للناس ويسلم عليهم
مش كلهم بس اهوه بيطيب خاطرهم
ومش بيسلم عليهم من وراء حجاب لالالالالالالالالا
كان فاتح شباك العربية في درجة حرارة 41 درجة مئوية
يعني كمان مش مشغل التكييف يا حسرة قلبي

تيجي هنا في إسكندرية بقى
في هواء ونسيم إسكندرية الساحر
العربية متفيمة آخر تمام
وطبعا تكييف مش عادي دا تكييف مركزي شغال

إسكندرية مرشقة بعساكر الأمن المركزي
أقسم بالله وليس مبالغة كل متر عسكري
وكل 15 متر ظابط لا يقل رتبته عن رائد
الركاب (الركاب بكسر حرف الراء ده اللي هوا الموكب) فيه ما لا يقل عن 40 عربية
من أفخم ما عرفت القارات من أنواع السيارات
عروض طيران شغالة فوق معاليه
الكورنيش محاصر بالحرس الجمهوري
شباب زي الورد واقف متحنط في الشمس بالساعات
علشان يحموا الريس مبارك
أمال مين يحمي مصر يا ريس ؟؟
دا إسرائيل ممكن تحتل سينا وانتا في إسكندرية يا ريس
مصر كلها بتحميك بعينيها يا ريس
مش محتاج تخاف للدرجة دي يا ريس
إحنا بنحبك
إيه اللي يخلينا نأذيك لما أحنا بنحبك؟؟

بس حقيقي زيارة حضرتك نعنشت الدنيا في إسكندرية
تحيا مصر
تحيا مصر لمبارك
تحيا مصر بمبارك

عدل سابقا من قبل mido في الجمعة أغسطس 15, 2008 3:51 pm عدل 1 مرات

رد: سري للغاية .. انا واصل إذا انا موجودالجمعة أغسطس 15, 2008 12:58 am

انت فظيع يا ميدو والله انا عايزه اقولك علي حاجه واحده انا بضابق اوي من اللي بيتكلم عن مصر كده خصوصا لو مش مصري او عايش بره لان قريبي كلهم بره مصر متعرفش اد ايه همه بره بيفتكرونا اد ايه مش لقيين ناكل ده حتي رغيف العيش بيسالو احنا بنجيبوا ازاي انا عايزه اقول حاجه بس والله طول مافيه شباب عارف هي ايه المشكله اكيد هانبقه احسن هنتقدم كمان انشاء الله بس لازم نحط ادينا علي المشكله ولازم كمان نرجع لربنا انا شايفه ان ده الحل الوحيد

رد: سري للغاية .. انا واصل إذا انا موجودالجمعة أغسطس 15, 2008 3:46 pm

شكرا للمرور الكريم جدا جدا
بصراحة ممكن تعتبريني غبي يعني
بس انا مفهمتش من رد حضرتك تقصدي إن انا صح ولا غلط ؟؟
ولو انا صح ربنا يكرمنا ويثبتنا
ولو انا غلط يبقى ممكن نحاول نصلح

طائرة جنابهالسبت أغسطس 16, 2008 4:51 am

هل فعلا إحنا انتصرنا في حرب أكتوبر
سؤال قريته زمان في إحدي الصحف المعارضة
إخص عليهم .. أهي دي بقى الحاجة الوحيدة اللي انا أعارض فيها وبشدة
لقد عبر الأبطال وحرروا أرض سيناء المغتصبة
قصدي اللي كانت مغتصبة
وده كله كوم والطلعة الجوية كوم
الطلعة الجوية كلنا عارفينها ..
طبعا كان لها فضل كبير جدا في النصر
يعني من الآخر اللي كان مطير الطيارات دي هوا اللي المفروض نشكره

العجيب في يوم 6 أكتوبر كان العيال الصغيرة في سينا قاعدين يهتفوا ويلعبوا وفرحانين
أوى أوى أوى فأنا استعجبت إزاي حرب وإزاي الأطفال الصغيرة دي بتلعب في الشارع
أكتشفت في هذا اليوم بالتحديد
ومن أحد علماء التاريخ وأحد أعظم مؤرخي مصر
قال لي العيال دي كانت بتلعب ليس من أجل طلعة جوية حربية
وإنما لأنهم في سينا كانوا مستنيين فعلا طلعة جوية حقيقية
لكنهم وجدوا بتاع ( إختارناه إختارناه إختارناه ) طالع طلعة ممتازة بطائرة ورقية من النوع (إف عليك 16) تصنيع سويدي تقفيل مصري
وأحب أشكر الفنانة اللي غنت الأغنية الجميلة دي وبالذات الجزء بتاع ( خد نصها والباقي وراه ) إختارناه

رد: سري للغاية .. انا واصل إذا انا موجودالسبت أغسطس 16, 2008 9:00 am

طيب ومالو ياميدو
ايه الضرر ف كده؟؟
مهى الاغنيه حلو ومسمعه عند كل الناس
انا عن نفسى بحبها اوى !!!!
بس اللى محيرنى بأه
ان احنا فعلا اللى اختارناه ؟؟؟

رد: سري للغاية .. انا واصل إذا انا موجودالخميس أغسطس 28, 2008 12:53 am

بس اللى محيرنى بأه
ان احنا فعلا اللى اختارناه ؟؟؟

رد: سري للغاية .. انا واصل إذا انا موجودالسبت أغسطس 30, 2008 4:08 am

السلام عليكم ورحمه الله وبركاته

فى الاول انا اسفه انى اتاخرت طول المده دى كلها فى الرد
يعنى لا اله الا الله
بجد انا مش عارفه اقول ايه يا ميدو بجد فعلا الموضوع يعنى
انت عارف انا لما قريت الموضوع حسيت ان انا كنت فدنيا ورحت لدنيا تانيه خالص كنت فوق وبقيت تحت قوى
يعنى انا على الرغم نى عاررفه الى فالبلد واللى بجرى فيها بس مكنتش حاطه فدماغى يمكن لانى يئست من التغيير يمكن لانى تعبت من التفكير فى الى احنا فيه ؟
ان يمكن بقالى فترة طويله اوى مفكرتش فى كل اللى احنا فيه ده محستش بيه ويمكن برضه انا مش لمساه اوى لانى لسه متعرضتش فى حياتى لحاجات تخلينى احس بيه ؟مش عارفه
بس بقى اللى انا عارفاه ومتاكده منه ان اللى االحنا فيه ده مش هيتغير وهنفضل زى مااحنا وان حتى ان اتغيرنا فهيكون للاسوأ
ده احنا المصريين بقالنا زمان وزمان بنشتكى ولا حاجه اتغيرت
ممكن نعد نتكلم ونطالب ونشتكى واحنا عارفين انه مفيش تغيير بس نعمل ايه ما باليد حيله
ياااااااه ياميدو والله رجعت اشيل الهم تانى
اه من المهم ان كلنا نحس بالى احنا فيه بس هيفيد ايه؟ولا حاجه غير حمل الهم
الاحسن اننا نفضل ضاحكين على نفسنا وان احنا نرضى بالى احنا فيه
وربنا عالظالم والمفترى
وحسبنا الله ونعم الوكيل
وفى النهايه انا بشكرك بجد فعلا على المجهود الهايل ده بجد يا ميدو انت تستحق التقدير والاحترام

رد: سري للغاية .. انا واصل إذا انا موجودالسبت أغسطس 30, 2008 12:19 pm

انا بشكرك جدا جدا
وبوعدك إننا إن شاء الله لازم نغير البلد دي

رد: سري للغاية .. انا واصل إذا انا موجودالسبت أغسطس 30, 2008 4:06 pm

بسم الله الرحمن الرحيم

أصابني هلع شديد وصل بي إلى مرحلة الجنون ، أصابني رعب مذهل ، ذلك اليوم أو تلك الأيام التي قضيتها تحت رعاية كبار مسئولي الدولة ، نعم ، رغم معارضتي الشديدة لنظام البلد ، قضيت أكثر من خمس أسابيع تحت رعاية كبار مسئوليها وبتدعيم من رئاسة جمهوريتها .
رحلات للشباب على نفقة الدولة ، كل هدفها مسح دماغهم _ أو تقريبا إزالتها _ وتركيب دماغ أخرى كل ما فيها شعار واحد هو شعار الحزب الوطني هو الطريق إلي مستقبل أفضل .
- نجد أن الحزب الوطني ينفق أموال الدولة في الدعاية
- نجد أن أموال الدولة تنفق علي تأمين مواكب الحبايب المسئولين
- نجد أن أموال الدولة تنفق على إعداد وجبات العشاء للباشاوات والكبار
- أموال الدولة تنفق على طلبة أقل ما يقال عنهم أنهم تافهون لا علاقة لهم بالحياة ولا فائدة منهم عير أنهم يصفقون لما يقال من خزعبلات وأحلام لا طائل منها .. ينافقون كما ينافق الجميع .. طلبة ساذجون والدليل على ذلك مدى تفاهة أسئلتهم الموجهة إلي السادة الحبايب
- أموال الدولة لا تنفق إلا على أشياء لا علاقة لها بمصلحة الشعب
- ولكن ليس هذا ما أحزنني .. ليس هذا ما أهالني وأصابني بالاحباط
أسمحولي أكمل كلامي باللغة العامية بتاعتنا
تخيلوا يا شباب إن السادة الأحباب لما ييجوا يقدموا السيد الضيف اللي جاي يشرفنا وينورنا بيقدموه ويقولوا
بسم السيد الرئيس وبسم نجل السيد الرئيس .. أتعتقدون أن هذا كفر بالله أم أنهم من شدة نفاقهم أعتقدوا ان السيد الرئيس أصبح ربا لذلك بدلوا بسم الله الرحمن الرحيم بمقولة بسم الرئيس ونجل الرئيس

بعد كل اللي انا قولته ده نفسي أقول حاجة واحدة وحشورة في ظوري ( لا تعليق )

رد: سري للغاية .. انا واصل إذا انا موجودالسبت أغسطس 30, 2008 5:15 pm

وانا فى نكته واقفقه فظى والله تتحذف بقى تفضل المهم انى نزلتها
واحد اتحشر في زحمة المرور
فلقى واحد بيخبطله على شباك السيارة
فتح الشباك
>> >>
قاله :- عايز ايه ؟
>>>>
قاله : الريس خطفوه و الفدية 5$ مليون دولار
و لو الفدية ماتدفعتش ..
>>
الخاطفين هددوا يدلقوا عليه بنزين
و يولعوا فيه و احنا بنجمع تبرعات
>> ..
تحب تشارك ؟
>>>>
الرجل سأل:
و في المتوسط الناس بتتبرع بكام ؟
>>>>
الرجل الثاني :
من 5 الى 10
لتر بنزين

رد: سري للغاية .. انا واصل إذا انا موجودالسبت أغسطس 30, 2008 9:23 pm

النكتة مقبولة للغاية

الكبير عليك يا كبيرالأربعاء سبتمبر 03, 2008 4:08 pm

إجتمع الكبير مرة بالناس الحلوة اللي زي الفل
طبعا عارفين الكبير وعارفين الناس الحلوة اللي زي الفل
المهم أنه سأل الناس الحلوة دي وقالهم : انا ليه الشعب مش بيحبني ؟؟ وعلى طول يدعي عليا ، وعلى طول يعملوا مظاهرات واعتصامات واضرابات ، هوا انا عملتلهم حاجة ؟؟
فيرد عليه كبير الناس الحلوة اللي زي الفل ويقوله : شقاوة شعب يا أفندم ....

في الموضوع كله لم أجد شيئا أعلق عليه غير جملة انا عملتلهم حاجة ؟؟
أحب أقولك يا كبير إنك فعلا معملتش أي حاجة
بنتضرب ونتهان ومعملتش حاجة
وبنتهزأ ونتشتم ومعملتش حاجة
البلد بتخرب وتتسرق على إيد حبايبك ومعملتش حاجة
الناس مش لاقية تاكل وانتا يا كبير بتاكل باتون ساليه الصبح مع الجبنة الدنماركي والعيش الفرنسي
الشحاتين يا كبير بقوا أكتر من الهم على القلب والحرامية بقوا أكتر وأكتر
قال إيه ماس كهربي ولع في مجلسي الشعب والشورى ورا بعض شوفت الهنا ؟؟
وإلخ إلخ إلخ .............

بعيدا عن الأسلوب الهمجي والمتعصب والمتشدد والهزلي اللي انا بتكلم بيه ده
أحسن حد يفكرني بستهبل
أحب أتكلم جد شوية مع إني مش بعرف أتكلم جد خالص بس هحاول

طبعا كل الناس بتحاول تتقرب من ربنا والنس بيزيد عندها النزعة الايمانية شوية
يا ترى الكبير وزبانيته بيحصلهم كدة ؟؟
ياااااا رب يكون بيحصلهم كدة
يا ترى والكبير بيقرأ القرآن
وبيقرأ في سورة الزمر وصادفته الآية الكريمة ( إنك لميت وإنهم ميتون )
يا الله ، مش عارفين أهم هيموتوا ؟؟
والله يا كبير كل الناس هتموت
كله هيتدفن في قبر متر في متر ولو كبر شوية هيبقي متر في متر ونص
طبعا دا بعيد عن حضرتك
قبر معاليك هيبقى مجمع سكني خمس نجوم مكيف الهواء يطل على البحر في أرقى مناطق مصر
طبعا من الدنيا إلي الجنة يا كبير
طبعا حضرتك مستعجل على الجنة ونفسك تموت بدري بس الدنيا هيا اللي متبتة فيك
بس انا بدعيلك ربنا يكرمك بسرعة وتتكل
طبعا فيه ناس حبايبك هيمشوا يعيطوا وراك
وهما ماشيين وراك ينتحوا زورا وكذبا يطلع عليهم قطاع طرق من تحت الأرض يتخضوا ويتفزعوا يقوم يتقطع خلفهم من الخضة نقوم نرتاح من نسلهم القذر ومنشوفش منهم عيال
وبعد ما يتقطع خلفهم يطلع عليهم فوج عقارب من تحت الأرض برضو يقرصوا فيهم لحد ما يشبعوا تقريص وبعد كدة يطلع عليهم شوية أسود جعانة تنهش في لحمكم وتقطع قلوبكم القاسية وتسيبكم وتمشي وطبعا انتوا مش هتموتوا دلوقتي لسة الدعوة شغالة ، تقوم بعد ما الأسود تشتغل يطلع عليكم حوتين وسمكتين قرش من تحت الأرض يبلعوكم ويشربوا بعد ما يبلعوكم مية نار تنزل عليكم في بطون الأسماك المتوحشة دي تقوم مسيحة جلودكم وبعد كدة يقوم الأسماك المتوحشة دي تقرف منكم تقوم منيلاكم مرجعاكم للدنيا تاني وتنزلوا على الأرض تاني
وبعد ما تنزلوا على الأرض تلاقوا طريق تمشوا على الطريق علشان عربية تيجي تاخدكم
وانتوا ماشيين يطلع عليكم قطر يكون السواق بتاعه أعمى وأصم وأبكم يدوس علي رقابتكم كلكم ويخلصنا منكم قادر يا كريم يا رب
طبعا في الحالة دي هتسيبوا الكبير متنشر في الشمس لحد ما يتحلل
عارفين كل اللي انا قولته دا ليه ؟؟
علشان مهما عملوله من قبور ومدافن فهوا مثواه الأخير التراب الترااااااااااااااااااااااااااااااااااب
علشان هوا ميستاهلش غيره

الكبير عليك يا كبير

رد: سري للغاية .. انا واصل إذا انا موجودالخميس سبتمبر 04, 2008 1:07 am

يا جماعة
الكلام ده للناس اللي بيعجبها الموضوع أو المواضيع بتاعة سري للغاية
عايزهم يشتغلوا معايا
والله انا بكتب الحاجات دي علشان نتسلى مش اكتر
عايزكم تشاركوني
وكل واحد عنده فكرة لموضوع يقولهالي
طبعا موضوع تبع سري للغاية
يعني مثلا عنوان كويس لمقالة
أقوم انا بعون الله كاتب موضوعه كامل بالعنوان اللي حضراتكم ممكن تشاركوا معايا فيه وتبعتوه
ويا رب الفكرة تمشي لأننا لازم نتعاون
وأرجع وأقول أهو إحنا بتسلى

فمثلا انا هقول الموضوع القادم بعنوان سيارة للبيع
يقوم حد قايلي لأ احنا ممكن نكتب موضوع بعنوان مصر في صورة
أو حد يقولي عنوان مصر طويلة التيلة
أو عنوان مش هنا خالص

طبعا دي عناوين لمقالات قديمة
لازم نبتكر إحنا
والكلام ده إلي من يهمه الأمر

رد: سري للغاية .. انا واصل إذا انا موجودالإثنين سبتمبر 08, 2008 5:15 pm

الله يجازيك يا ميدو

والله وانا بقرأ كلامك غصب عني ضحكت

انت عارف المثل اللي بيقول

هم يضحك وهم يبكي

اهو ده بقي الهم اللي يضحك

فصبرنا يا رب علي بلوانا

وبجد شكرا ليك يا ميدو علي مجهودك

بجد انت عامل شغل زي الفل

وبتقول اللي جوانا واحنا مش قادرين نقوله

سري للغاية .. برميل طرشيالأربعاء سبتمبر 10, 2008 3:17 pm

السيدات والسادة
إليكم الخبر اللي لسة واصلنا طازة ده
الصلاة ع النبي الأحوال في البلد زي العسل والزعيم زي البمب وابن الزعيم مقضيها بمزاجه والبلد بلد أهله ومفيش مشاكل في الحارة .. عفوا أقصد مفيش مشاكل في البلد

إقلب معايا القناة دي ونجيب قناة تانية
أيها السادة والسيدات الأخوة والأخوات إليكم البيان التالي
صرح الدكتور عباس نفسنة بأن البلد زي ما هيا ولا أكن حاجة حصلت .. وأبقاو تعالوا تفوا على وشي وأحلقوا دقني لو واحد من هؤلاء الفشلة الذين يعجزون عن إطفاء حريق أو إنقاذ غرقى مركب أو إخراج أشلاء من تحت الأنقاض أو حتى القبض على فرخة مصابة بإنفلونزا الطيور أو إنقاذ الآف الموتى والمصابين على الطرق كل عام
لن يحسوا بأي تأنيب ضمير .. وقدموا إستقالتهم وروحوا ناموا
أبدا مش هيحصل .. وهيفضل الفاشل فاشل والمهمل مهمل

السيدات والسادة إليكم التصريح
السيد ابن الزعيم يرتع في البلاد بالمدرعات والآف من جنود الأمن المركزي والمذيعين والصحفيين ووزراء البلد المحروسين ويزور القرى والنجوع ويقابل فلاحين وهميين من صنع الأمن
فلاحين من النوع الذي يبحث عن وظيفه لأبنه وعايز يودي الواد المدرسة واللي عايزة برسيل تغسل الهدوم
فلاحين من اللي بيخافوا يعكوا في الكلام يقوم شيخ البلد يزعل منهم ويسلط عليهم شيخ الغفر

نقلب إلي القناة الدينية بقى
أيها الأخوة والأخوات أحبتي في الله
إليكم الوكسة والنكسة التالية
لقد ظهر غضب الله علينا وظهر إعجاز الآية الكريمة ( أمرنا مترفيها ففسقوا فيها )
اه والنعمة يا أخواني
ملايين الدولة تبدد على زيارات أفندينا وابن أفندينا
وبقت تبدد على إبن أفندينا أكتر
اه والله
لم ولن يخلع هذا النظام برقع الحياء لأنه لم يلبسه أصلا
فيتاجر ابن الزعيم بجولاته السياحية الدعائية في قرى مفروض فيها حظر تجوال لأن جناب سعادة أهله وصلها
جاوبوني بالله على سيادتكم بأي حق ؟؟
بأي حق يقوموا بإهدار أموالنا لتغطية زيارات وجولات السيد المبجل ؟؟
بأي حق ؟؟
السيدات والسادة أرجو منكم أن تقفوا دقيقة حداد
السيدات والسادة أرجوكم
أيها الراقدون تحت التراب أفيقوا
أفيقوا بالله عليكم
السيدات والسادة أنتحبوا كالنساء
السيدات والسادة إليكم النبأ التالي
تم بحمد الله وبفضل مجهودات السادة المسئولين
وبم إن مفيش فساد
قام هؤلاء السادة بتحويل السد العالي إلي برميل كبييييييييير من الطرشي
علشان نفتح نفس سيادته على الحكم
الله يسد نفسه ونفسهم

رد: سري للغاية .. انا واصل إذا انا موجودالخميس سبتمبر 11, 2008 2:02 am

والله مانا عارفه اقولك ايه على الموضوع ده ياميدو وعلى مجهودك الرائع لنقل الصورة الي كلنا عارفينها للاسف
وبصراحه انا ماقريت الموضوع كله بس ليا عوده ليه تاني ان شاءالله
وفعلا زي ماقالت الاخت هم يضحك وهم يبكي بس انا استوقفني حزء عجبني اوي اوي في الموضوع وهو جزء الصور اللي حكت عن كل شيء
[ندعوك للتسجيل في المنتدى أو التعريف بنفسك لمعاينة هذه الصورة]

وفي المقابل

[ندعوك للتسجيل في المنتدى أو التعريف بنفسك لمعاينة هذه الصورة]

فعلا انسب تعليق هو "لا تعليق"

لو تعرف بجد اد ايه الشعب الفلسطيني بيكره مصر وبيكرهنا..بس للاسف معذورين والله..وللاسف ليا علاقة بفلسطنيين ولما حد فيهم بيكلمني عن اللي مصر بتعمله مش بقدر افتح بقي لاني عارفه انهم على حق اذا كنت انا المصرية بقول حسبي الله ونعم الوكيل فمبالك هما هيقولوا ايه للاسف كل اللي بقدر اوصلهولهم ان الشعب المصري هو كمان محتل زيهم بس يختلف احتلالنا عن احتلالهم في حاجه ان احنا اللي احتلونا هما اولاد بلدنا
معلش طولت عليك ياميدو بس بجد موضوعك اثر فيا اوي
وبتقولي جرأه وهتجيب عيش وكباب ايه بقى ده انا اللي شكلي هجيبهوملك ههههههههههههههه
يلا ربنا يسترها علينا كلنا

رد: سري للغاية .. انا واصل إذا انا موجودالخميس سبتمبر 11, 2008 3:49 am

مرور طيب
وربنا يستر علينا فعلا

رد: سري للغاية .. انا واصل إذا انا موجودالجمعة سبتمبر 12, 2008 3:14 am

سري للغاية .. وعجبي

هل أصبح وهمآ وخيالا علميا وإعجازا من إعجازات الدهر والعصر وحلما لا يمكن تحقيقه ومستحيل من المستحيلات
لا أتحدث عن الوصول إلي الشمس ولا أتحدث عن المشي على الماء بالقدمين ولا أتحدث عن نقل الأهرامات إلي الصين
ولكني أتحدث عن عنوان لموضوع كتبه مدير المنتدى بعنوان إقالة حكومة نظيف
صدقت ما قرأت حتى علمت بأنه ( مقلب ) أعده المدير لكي يصيبنا هبوط حاد عندما ندخل فنجد أنها دعابة
كم تمنيت أن أكون أول المتصلين بالأهل والأحباب لكي أهنئهم بهذا الخبر
كم تمنيت أن أوزع الشربات و ( الحاجة الساقعة ) و لو الناس حبت تشرب ( موغات ) كنت هوزع ودا حقهم يشربوا موغات لأن مصر هيبقى ربنا نتعها بالسلامة من الحمل التقيل اللي كانت شايله
كثيرا ما نسمع عن وزراء ومسئولين تنحوا عن مناصبهم لعدم قدرتهم على تسيير الأمور المفروض أنها ( لعبتهم ) ومتخرجش من إيدهم
ليه مش بيحصل كدة عندنا ؟؟
حد يجي المساحة بتاعة الحمام علشان يحوش الدم اللي هيطرطش من اللي مش هيقولي ليه ؟؟
حد يقولي هل يصح إن الحكومة تكتب على أنقاض منازل حي الدويقة ( مقبرة جماعية ) ؟؟
هل يصح أن القوات التي حطمت في مثل هذا اليوم خط برليف بدفاعاته وحصونه ومتانته وأنقذت المنصريين ان تفشل في زحزحة صخرة في المقطم لإنقاذ مواطن
هل بعد 35 من هذا الانجاز بات المصريون أضعف من إزالة حجر لإنقاذ المجروحين ؟؟
وزي ما قال حبيبي صلاح جاهين
حقرا وفوق كوكب حقير محتقر
في الكون تكون دنياكو إيه يا بقر ؟؟
ومش هكمل الباقي بقى حلو أوى لحد كدة

الموضوع القادم .. انا واصل إذا انا موجود

سري للغاية .. أنا واصل إذا أنا موجودالإثنين سبتمبر 15, 2008 1:42 pm

عنوان واضح جدا لكل قاريء وكل متابع وكل بني آدم وبني آدمة وكل نفر هيدخل هنا ويشوف الكلام ده ولكل الحبايب اللي قاعدة في أم الدنيا مصر
هل أصبحت بلدنا محطة للوسايط والرشاوي والمحسوبية والهمجية وقلة القيمة
لأنك لو مش حاجة مش هتعرف تعمل أي حاجة
علشان تخلص ورقة بشلم لازم تكون عارف المدير بتاع المكان ده والمدير يكون عارف أنك عارف الظابط الفلاني في المباحث والظابط اللي في المباحث يكون عارف أنك عارف العقيد اللي في الداخلية والعقيد اللي في الداخلية يكون عارف أنك عارف اللواء اللي في رئاسة الجمهورية واللواء بتاع رئاسة الجمهورية يكون عارف أنك عارف وزير الداخلية شخصيا ويكون وزير الداخلية على علم بأنك تعرف الراس الكبيرة من أيام الطفولة وإنك متوصي عليك من أكبر راس في البلد
مع إنك ممكن تستسهل كل ده وترمي الورقة أم شلم دي في البحر وتقعد في بيتكم أفضل
والحكاية بقت ماشية اللي معهوش ميلزمهوش
لو انتا متعرفش المدير اللي عارف الظابط اللي عارف اللوا اللي عارف الوزير
لازم تدفع يا معلم .. وانتا ومنظرك بقى
يعني ممكن تدفع من خمسة لحد 100 جنيه وانتا ونباهتك ووجاهتك وقناعتك
من الآخر بقى البلد مبقتش بلد
البلد دي بقت وهم كبييييير واللي عايز يقعد فيها يبقى زي عادل إمام في فيلم اللعب مع الكبار (بيحلم)
طبعا كلنا شوفنا الفيلم إمبارح

مرة واحد صاحبي سألني عن البلد فالحوار أنا لخصته كالآتي :
قال لي الصديق :
قل لمن البلاد ؟؟
فسألته أي البلاد ؟
فأجابني : هذا البلد
فنظرت خلفي في هلع
وأجبته :
هي غمة ..
وستنقشع

رد: سري للغاية .. انا واصل إذا انا موجودالثلاثاء سبتمبر 23, 2008 3:27 pm

انا واصل اذن انا موجود

هو ده فعلا الشعار القومي في بلدنا الغالية

ام الدنيا

مصر

رد: سري للغاية .. انا واصل إذا انا موجودالثلاثاء سبتمبر 23, 2008 4:04 pm

لاتتعجب ...انت في مصر

اهلا بك يا زائر لديك 16777214 مساهمة

سري للغاية .. انا واصل إذا انا موجود

descriptionسري للغاية .. انا واصل إذا انا موجودالسبت يوليو 05, 2008 4:17 am

descriptionالوهم الأكبر في مصرنا المحروتةالسبت أغسطس 02, 2008 11:33 am

descriptionرثاء وطن وشعب لا يستحق العيش فيهالإثنين أغسطس 04, 2008 2:18 am

descriptionرد: سري للغاية .. انا واصل إذا انا موجودالإثنين أغسطس 04, 2008 2:06 pm

descriptionرد: سري للغاية .. انا واصل إذا انا موجودالإثنين أغسطس 04, 2008 3:50 pm

descriptionرد: سري للغاية .. انا واصل إذا انا موجودالخميس أغسطس 14, 2008 10:55 pm

descriptionرد: سري للغاية .. انا واصل إذا انا موجودالجمعة أغسطس 15, 2008 12:58 am

descriptionرد: سري للغاية .. انا واصل إذا انا موجودالجمعة أغسطس 15, 2008 3:46 pm

descriptionطائرة جنابهالسبت أغسطس 16, 2008 4:51 am

descriptionرد: سري للغاية .. انا واصل إذا انا موجودالسبت أغسطس 16, 2008 9:00 am

descriptionرد: سري للغاية .. انا واصل إذا انا موجودالخميس أغسطس 28, 2008 12:53 am

descriptionرد: سري للغاية .. انا واصل إذا انا موجودالسبت أغسطس 30, 2008 4:08 am

descriptionرد: سري للغاية .. انا واصل إذا انا موجودالسبت أغسطس 30, 2008 12:19 pm

descriptionرد: سري للغاية .. انا واصل إذا انا موجودالسبت أغسطس 30, 2008 4:06 pm

descriptionرد: سري للغاية .. انا واصل إذا انا موجودالسبت أغسطس 30, 2008 5:15 pm

descriptionرد: سري للغاية .. انا واصل إذا انا موجودالسبت أغسطس 30, 2008 9:23 pm

descriptionالكبير عليك يا كبيرالأربعاء سبتمبر 03, 2008 4:08 pm

descriptionرد: سري للغاية .. انا واصل إذا انا موجودالخميس سبتمبر 04, 2008 1:07 am

descriptionرد: سري للغاية .. انا واصل إذا انا موجودالإثنين سبتمبر 08, 2008 5:15 pm

descriptionسري للغاية .. برميل طرشيالأربعاء سبتمبر 10, 2008 3:17 pm

descriptionرد: سري للغاية .. انا واصل إذا انا موجودالخميس سبتمبر 11, 2008 2:02 am

descriptionرد: سري للغاية .. انا واصل إذا انا موجودالخميس سبتمبر 11, 2008 3:49 am

descriptionرد: سري للغاية .. انا واصل إذا انا موجودالجمعة سبتمبر 12, 2008 3:14 am

descriptionسري للغاية .. أنا واصل إذا أنا موجودالإثنين سبتمبر 15, 2008 1:42 pm

descriptionرد: سري للغاية .. انا واصل إذا انا موجودالثلاثاء سبتمبر 23, 2008 3:27 pm

descriptionرد: سري للغاية .. انا واصل إذا انا موجودالثلاثاء سبتمبر 23, 2008 4:04 pm