: Mohammed Orochimano
السلام عليكم ورحمة الله وبركاتهمش هاخد من وقتكم كتير في القراءة بس حبيت أوضح نقطة مهمة في شغلنا
علشان يكون التعامل أسهل وأيسر مستقبلا
أولا إحنا فريق عمل واحد
يعني كلنا سواسية وكلنا علي قدر المساواة
مفيش ريس ولا بوب ولا ليدر ولا عمدة ولا حتي شيخ بلد
بالتالي الكل متوقع من الكل انه يشتغل ويساهم بأي شكل يقدر عليه
بالتالي عايزين نبعد نفسنا عن خانة فلان ريس المجموعة وفلان ليدر المجموعة والكلام المعروف دا كله
ثانيا مش معني اني بطلع اتكلم او فلان بيطلع يتكلم يبقي بندي ارشادات او تعليمات او أوامر
العملية كلها مسألة تنظيم مش أقل ولا أكثر
ومن الورشة الجاية مش هطلع اتكلم الا لو حاجة انا مجهز لها او حاجة هتكلم فيها فقط لا غير
بينما كل واحد يعرض فكرته بنفسه ويعرض وجهة نظره بنفسه
يعني انتم بنفسكم اللي هتديروا الورش كلها
اللي عنده فكرة او اقتراح لا يتردد بطرحه للنقاش
اللي عنده عتاب او إعتراض لا يتردد بطرحه للنقاش
وفكر الجزء مش بالضرورة يتطبق علي الكل
يعني مثلا مانو مش قال فكرة يبقي الكل هيشتغل فيها او عليها
لا العملية مش كدا ولا عايزينها تمشي كدا
عايزين مانو قال راي كلنا نناقشه ونشوف يصلح ولا لآ
البرنس قال راي كلنا نناقشه ونشوفه يصلح ولا لآ
فلان قال راي كلنا نناقشه ونشوفه يصلح ولا لآ
بحيث يبقي القرار في النهاية قرار مجموعة وليس قرار فرد
وكل واحد فينا يقول رأيه ما ينكسفش ولا ينحرج ولا يتردد ولا يفكر انه هيزعل حد برأيه
لازم يكون بينا نوع من المصارحة بما اننا كلنا كبار وناضجين وبعيدين كل البعد عن الاساليب القديمة زي الزعل والقمصة واللذي منه
ثالثا
وأخيرا في بعض المواقف اللي تتطلب تقسيم أنفسنا لمجموعات زي مثلا توزيع
المطويات او تعليق المعلقات او غيرها من المشاريع المستقبلية
اكيد كل مجموعة هتبقي مسئولة عن نفسها والكل فيها سواسية وشغالين بجد واصرار علشان مفيش حاجة تتعطل او تتأخر
فياريت كلنا يكون عندنا صورة في ذهننا وهي المساواة والاخلاص في انجاز الحاجة المكلفين بيها
بس كدا دا اللي كنت عايز أقوله
ويا ريت نخلي الموضوع دا دايما لمناقشة اي سلبيات تظهر بحيث نناقشها في جو هادئ ونتخلص منها أولا بأول
وشكلي طولت في الكلام عكس ما كنت ناوي ^_^
وشكرا لكم