ندوه العميد......افكار وأراء اقترحات ومناقشات " الكل يدخل"

ندوه العميد......افكار وأراء اقترحات ومناقشات " الكل يدخل"الثلاثاء أبريل 21, 2009 10:20 pm

السلام عليكم ورحمه الله وبركاته

طبعا كنت اعلنت في وقت ماضي عن اعلان بخصوص

ندوه مناقشه المشاكل الطلابيه في الدراسه

وهتكون يوم الاثنين القادم 27/4/2009
الساعه 11
بمدرج 2

مع
الأستاذ الدكتور عميد الكلية

طيب هسأل سؤال؟؟؟
مين عمل حسابه انه هيحضر وجهز اسئلته بقي؟؟؟؟
مين قال انا متشجع هقوم واتناقش مع عميد كليتنا؟؟؟
كلنا عندنا مشاكل بلا اثتثناء وكلنا عايزين حلول
الكل دماغه بقت كبيره بيعرف يفكر ويطرح مقترحات وحلول للمشاكل
ليه مش ننظم افكارنا ونبدأ نفكر ونقول :
لازم اروح لان دي فرصه بجد مش هتتعوض
لازم ااقول مشكلتي
لازم اكسر قيود وصمت الكلام
كل حاجه متاحه قدامي من غير قيود وليه لا

ومن هنا نعودكم من الان
ان اي مشكله مهما كانت صغيره هتتعرض في الندوه بمشيئه الله
بس انتم لازم تحضروا علشان تعرف مشكلتك هتتعرض حقيقي
وهتتناقش كمان قدامك وقدم الجميع

يعني المطلوب مننا ايه؟؟

اننا في الموضوع ده نفتح باب النقاش في كل شئ
ممكن نطرحه في الندوه من اسئله

قول مشكلتك عن :
المدرجات / المعامل / قاعات التدريس / الشرح / الكتب الدراسيه
/ الدكاتره / المعيدينالدروس الخصوصيه / طرق الشرح المتبعه
/الفنيين بالمعامل / الاستغلال/ اسعار الكتب
كل حاجه بجد غايبه عني الان وعلي بالكم انتم

لو مش هنتكلم ونقول دلوقتي
هيبقي امتي؟؟؟؟
بجد لازم نفوق شويه ونستغل اللي معروض قدامنا

انا مش بقول كده علشان نجيب عدد في الندوه وتطلع بصوره ظريفه
لا والله احنا هنا في المنتدي من سنه وشهر
ودايما عايزين صوتنا يبقي مسموع
وهو ده هدف المنتدي
والحمد لله الفرصه جت
وانا اول واحد هستغلها بمشيئه الله
وهعرض كل مشاكلي
يا ريت بجد الاقي كل مشاكلهم هنا
علشان نطبعها ونعرضها في الندوه
وبجد يا ريت الاقيكم كلكم هناك
علشان تشوفوا نجاح افكاركم

سلام عليكم

اخوكم / هشام فتحي
مدير المنتدي

رد: ندوه العميد......افكار وأراء اقترحات ومناقشات " الكل يدخل"الثلاثاء أبريل 21, 2009 10:27 pm

كل اللى قولته فى ايرورز و زود المكتبة و الكتب النسخة الواحدة و الاستعارة و التصوير اللى جو المكتبة

و خد كمان الاتحاد بتاع الطلبة و كمان جداول الامتحانات اللى مش بنعرف نغيرها

طبعا بشكر مبادرتك يا هشام و ربنا يكرمك و نعمل حاجة لو مش شوفنا نتيجتها دلوقت يشوف اللى بعدنا ثمرة ده

رد: ندوه العميد......افكار وأراء اقترحات ومناقشات " الكل يدخل"الثلاثاء أبريل 21, 2009 10:53 pm

ومن هنا نعودكم من الان
ان اي مشكله مهما كانت صغيره هتتعرض في الندوه بمشيئه الله
بس انتم لازم تحضروا علشان تعرف مشكلتك هتتعرض حقيقي
وهتتناقش كمان قدامك وقدم الجميع

" كأنك أخدت وعد من عميد الكلية بكده " ؟؟؟

:

انا مش بقول كده علشان نجيب عدد في الندوه وتطلع بصوره ظريفه

" أكيد مش ده اللي تقصده " هو التليفزيون هيصور ولا ايه ؟ ؟

:

يا ريت بجد الاقي كل مشاكلهم هنا

" تقصد الغلابة اللي هما احنا " ؟؟

:

علشان تشوفوا نجاح افكاركم

بس انت متأكد ان هما هيلبوا مطالبنا كلها .. يا مسهل

مدير المنتدي

شكرا جزيلا يا هشام علي الروح العالية دي " أحسبها كذلك " ويريت فعلا الندوة تكون بناءة ونعرض كل مشاكلنا فيها .
بس في ناس بقالها مليون سنة بتنادي وتقول مشاكل كتير وسلبيات في الكلية لكن الكلية لا تنظر لهم ولا تبالي واعتقد ان هذه الندوة لن تخرج عن كونها فرقعة اعلامية .. طبعا كلامي مطلق وغير مبرر

لكن اقولك يا فندم :
ليه الندوة دي تزامنت مع ندوات مشابهه في كل جامعات مصر وآخرها الندوة اللي في جامعة القاهرة واللي حضرها محمود سعد ؟؟

ايا كان هنفترض حسن النوايا :

المشاكل اللي بتقابلنا كتير وهتزعل ناس كتير لو اتناقشت :

اولها الكوسة والمحسوبية .. والهيصة دي
ثانيا الغلاء الرهيب " الكتب والمصاريف "الخ
ثالثا : تحديث المعامل وتجهيزها امال الفلوس اللي احنا بندفعها بيعملوا بها ايه
رابعا : موضوع المكتبة مهم جدا .. نعمل لها اعادة هيكلة وتحديث للكتب والمراجع
خامسا : تحديث المناهج والتخلص ظاهرة طغاة الدكاترة ونناقش حالة كل دكتور وصالحيته لكونه دكتور ولو انها هتبقي صعبة بس هي مطروحة للنقاش والتوصل لحلول بشأنها .
سادسا : تفعيل الرعاية بشكل أكبر وعندي رؤيا واسعة في هذا المجال
...
في اشياء كثيرة لكن لا تسعفني الذاكرة وضيق الوقت

رد: ندوه العميد......افكار وأراء اقترحات ومناقشات " الكل يدخل"الثلاثاء أبريل 21, 2009 11:35 pm

انا مع جوهره القصر فى مقترحاتها
وبضيف كمان
ان اسلوب الساعات المعتمده اللى ماشين عليه
يتطبق صح
والاقى جدول الساعات المكتبيه لكل دكتور على مكتبه
والمرشد الاكاديمى يكون موجود
وعلى الاقل يكون معايا ايميله
واقدر اتواصل معاه
وياريت ياخروا السكاشن ل9
لان بجد والله المواصلات الصبح ربنا هو اللى اعلم بيها
واحنا الكليه الوحيده اللى بتبدأ 8 بقى كده مش حرام
انا اسفه يا اتش
لكن موضوع بجد كويس
علشان نقدر نرتب اوراقنا قدام العميد
تسلم ايدك مره تانيه

رد: ندوه العميد......افكار وأراء اقترحات ومناقشات " الكل يدخل"الثلاثاء أبريل 21, 2009 11:57 pm

السلام عليكم ورحمة الله وبركاته

طبعا شكرا لكل اللى ردوا على الموضوع

CHEMI

يا ريت تاخد الموضوع بجدية أكتر

الكلية لو مش حريصة على التواصل وفتح أبواب الحوار بين إدارتها وبين الطلاب ما كانتش أقدمت على خطوة مهمة زى كدا للتعرف على المشاكل اللى بتواجه الطلاب

أتمنى من الكل إنه يستفاد من الفرصة دى ويعبر عن أى مشكلة بتواجه وبدون إحراج أو كسوف

إدارة الكلية بتقولكم إية المشاكل اللى بتواجهوها وأعتقد مفيش فرصة أفضل من كدا للكلام

مشاكل فى الدراسة - طريقة الشرح - المصروفات - ال 50 جنية اللى بتدفع على كل مادة تشيلها

مستوى المعامل - الشرح بتاع المعيدين - تجهيزات المعامل

قولوا مشاكلكم وما تتحرجوش

أتمنى أشوفكم كلكم فى الندوة وإن شاء الله يوصل كلامنا كله للإدارة

شكرا لكم

رد: ندوه العميد......افكار وأراء اقترحات ومناقشات " الكل يدخل"الأربعاء أبريل 22, 2009 12:24 am

سلام عليكم
شكرا علي الردود

جوهره القصر
قطر الندي
مانو

كل الشكر وكل مشاكلهم هتتعرض ان شاء الله

الشيمي

" كأنك أخدت وعد من عميد الكلية بكده " ؟؟؟

انت ليه شايف اننا قليلين
وهو لازم اخد وعد من العميد علشان ابقي صادق
عامه انا واخد موافقات من ناس شغاله في المجال ده
والحمد لله احنا كلمتنا ميثاق

" أكيد مش ده اللي تقصده " هو التليفزيون هيصور ولا ايه ؟ ؟

لو انا شايف ان في مشكله
يبقي اول مشكله بطرحها
عقول الطلبه وتفهمهم للوضع
والكلام الجاد والفكر المعتدل
والبعد عن اي انتماءات
والا ايه؟؟؟

" تقصد الغلابة اللي هما احنا " ؟؟

اعتقد اننا مش غلابه اوي كده
والحمد لله واخدين حقنا برضه
اه في مشاكل وظلم
واحنا طلبين نحلها مش اكثر

بس انت متأكد ان هما هيلبوا مطالبنا كلها .. يا مسهل

مش لازم نصحي تاني يوم
نلاقي الحياه بنبي
والسما زرقا يا شيمي
بس لو قدرنا نشوف التغيير ده يبقي ده في حد زاته نجاح
وان شاء الله يلبوا مطالب كل الناس
انا عندي امل في كده
اتمني كلامي يكون وصل بالمعني المراد

وان شاء الله يا شيمي نعرض كل مشاكلك اللي زكرتها برضه

ومستني تفاعل كل الناس مره اخري
ونشوف باقي الاعضاء
وبجد مستني كثير منكم
وعلي امل ......

رد: ندوه العميد......افكار وأراء اقترحات ومناقشات " الكل يدخل"الأربعاء أبريل 22, 2009 1:23 am

CHEMI
يا ريت تاخد الموضوع بجدية أكتر
؟؟؟؟؟
وانا واخدة مش بجدية ؟؟

انا بناقش الموضوع بعقلانية وكل واحد حر في رايه - دي برده مهمه - وانا بعبر عن رايي باحترام وبتحضر ولو غلط في كلمة اتفضل وقولي . - انت ليك رايك وحق الرد -
انا كل اللي عايز اوضحه نقطة مهمة وعايز الناس تاخد بالها :
اذ فجأة كل جامعات مصر تقول ان احنا عايزين نناقش الطلبة في مشاكلهم
كون الفكرة نفسها روتينية ومش نابعة من العميد نفسه تجعل الموضوع هزلي

انت ليه شايف اننا قليلين
وهو لازم اخد وعد من العميد علشان ابقي صادق
عامه انا واخد موافقات من ناس شغاله في المجال ده
والحمد لله احنا كلمتنا ميثاق

انا لا شفت ولا حد قال .. انتم ناس زي الفل ها كويس
ومش هتكلم في النقطة دي خالص عشان نركز علي موضوعنا - ممكن افسر لك في الخاص -

يا ريت بجد الاقي كل مشاكلهم هنا - هما مين دول -
علشان نطبعها ونعرضها في الندوه

كلامك ده بيدل انك من منسقي هذه الندوة
واسلوبك غريب جدا .. ان لم يكن خطأ املائي - الله اعلم -

لو انا شايف ان في مشكله
يبقي اول مشكله بطرحها
عقول الطلبه وتفهمهم للوضع
والكلام الجاد والفكر المعتدل
والبعد عن اي انتماءات
والا ايه؟؟؟

يا الله .. متخلنيش اندم علي المشاركة
رد بعقلانية بعيدا عن التجريح ..ورد في صلب الموضوع
هو ايه اللي انت بتتكلم عنه ده
هو انا لما اناقش الموضوع ابقي متطرف .. عجبي
والا ده سطرين حافظينهم للرد علي اي انتقاد
علي جنب كده ابقي وضحلي النقطة دي
" ايه الفكر المعتدل وايه الفكر المتطرف "؟؟
قيس الكلام اللي انت قلته علي نفسك وحاول تفهم الامور من حولك ماشية ازاي

اعتقد اننا مش غلابه اوي كده
والحمد لله واخدين حقنا برضه
اه في مشاكل وظلم
واحنا طلبين نحلها مش اكثر

انت بتقول " مشاكلهم .. وانا اقصد بالغلابة اصحاب المشاكل " ايه اللي دخلك في الموضوع
مش انت واخد حقك تالت ومتلت .. طيب
بس بفكرك ان انت مش بتاخد حقك لواحدك ؟؟

مش لازم نصحي تاني يوم
نلاقي الحياه بنبي
والسما زرقا يا شيمي

ان شاء الله الخير اللي بيكسب
والباطل صوته ضعيف ..

طيب كلمة اخيرة ومش عايزين نجادل في بعض أكتر من كده :

احنا هنطلب من العميد انه يكرر الندوة دي بصفة دورية بحيث نشوف احنا انجزنا ايه من الندوات السابقة ويحدد لنا معاد الندوة الجاية
وان كانت النوايا سليمة هيبان الموضوع

وربنا يسهل

عدل سابقا من قبل CheMI في الأربعاء أبريل 22, 2009 6:39 pm عدل 1 مرات

رد: ندوه العميد......افكار وأراء اقترحات ومناقشات " الكل يدخل"الأربعاء أبريل 22, 2009 8:47 am

انا بتكلم بصوت مجموعة من اصحابى فى احصا وحاسب احنا من فترة بعتنا طلب للعميد بانة يغير حاجة فى نظام الساعات المعتمدة وهى انة يخلى عملية الرفع دى موجودة للناس الى اشتالت مواد لان الحاجة دى مش موجودة فى نظام الساعات المعمتدة وكمان يخلى الترم الصيفى ابتداء من السنة دى مش من السنة الجاية عاشان برضدك الى شيلشن حاجة يعيدوها الترم التانى ميطلعوش بيها تانية المفروض ان النظام دة موجود فى الساعات المعتمدة بس دكتر عمرو فى اول محاضرة اتعملت يوم الاتنين كان قال ان الموضوع ة هيتم من السنة الجايةيعنى الدفعة بتاعت 2010ياريت الحاجات دى تتناقش فى الندوة وكمان فى حاجة تانية بخصوص المكتبة انها دايما الكتب الموجودة مفيش تقريبا منها غير نسخة او اتنين يعنى كالعادة مش هينفع نستعيرهافالمطلوب ان عدد النسخ من الكتب دى تزيد شوية بحيث يمكن استعارتهاشكرااا

رد: ندوه العميد......افكار وأراء اقترحات ومناقشات " الكل يدخل"الأربعاء أبريل 22, 2009 8:47 pm

مش هرد غير بكلمه واحده علي اي اساءه لاي حد فينا
الموضوع ده معمول بجهود ناس تعبت من زمان في المنتدي

احنا منتدي علوم المنصوره
وكل طاقم الاشراف فيه طلبه من الكليه باقسامها المختلفه
مش بنشتغل لحساب حد
وكل النجاح اللي وصلناله ده بعيدا عن المحسوبيه والوسايط
الحمد لله النجاح نابع من اخلاصنا في شغلنا مش اكثر

مش هتكلم كثير في الموضوع ده لانه مش مخصص غير للشكاوي اللي هتتعرض في الندوه
افتخر اني بعرض مشاكلكم كلها
وموضوع الطباعه ده احنا عايزين نعمله علشان نوصل مشاكلكم للندوه
بس انا مش من منظمي الندوه
ويا ريت اكون كذلك ده شرف ليا
مادام صوتي وفكري هيوصل من غير صوت عالي وجري هنا وهناك
عامه
شكرا يا شيمي علي كلامك
انا مش زعلان منك مع انك فهمت كلامي غلط
وفهمتني شخصيا غلط

عامه مسيرك تعرف احنا تعبنا قد ايه علشان ننجح
والحمد لله نجاحنا ده وصلنا للي عايزين نعمله ده

انت قولت ان صوت الحق هو اللي بيكسب
طبعا ده كلام جميل جدا جدا
وان شاء الله بمشيئته وحده نقدر نحقق ده
بس دعواتك معانا

وياريت تقرأ مواضيعي في المنتدي
وتعرف احنا شغالين ازاي

ويا ريت يا جماعه الاقي تاني مشاركات ذي روما كده
بشكرك علي مشكلتك اللي وضحتيها وان شاء الله نعرضها

وشكرا ليكم جميعا واتمني رؤيتكم في الندوه جميعا

رد: ندوه العميد......افكار وأراء اقترحات ومناقشات " الكل يدخل"الخميس أبريل 23, 2009 11:09 am

ملك روحي كتب:

ياجماعه حد ينجدنا من النظام الجديد جدول الامتحانات للمستوى الاول ظالم جدا حرام 3 مواد فى الاسبوع ومدة الامتحان ساعتين بس

رد: ندوه العميد......افكار وأراء اقترحات ومناقشات " الكل يدخل"الخميس أبريل 23, 2009 12:08 pm

بسم اللة الرحمن الرحيم
بصراحة الموضوع دة فكرت فية كتير هل كلمنا هيتسمع هل هينفذ مش عارف بس بصراحة
اللى وصلت لة انى لازم اتكلم مفيش مشكلة بتتحل بالسكوت حتى لو مش هيتسمع ليا اول مرة
اكيد هيتسمع الثانية او الثالثة المهم اعبر عن وحودى حتى
المهم انا مشاكلى مش كتير احنا لازم نتكيف مع الواقع
حتى لو كان مؤلم المهم
هو لية الاهتمام كلة بمستوى خاص الفع اللى لم يطبق عليها نظام الجودة راحت عليهم ولا اية
ثانيا احنا الاهم عندنا نبنى منشأة ولا نبنى عقول يعنى احنا بنطبق نظام ادارى دا هيزود عقولنا
ازاى مش عارف بس نفسىى نهتم بالعقول افضل من كدا
ثالثا صلحيات الدكتور الحامعى مش كتير اقوى
دا غير المكتبة والروتين فى الشئون
وحاجات كتير معلش وجعت دماغكم بس دى مشاكلنا
منير الفداوى

رد: ندوه العميد......افكار وأراء اقترحات ومناقشات " الكل يدخل"الخميس أبريل 23, 2009 3:09 pm

شكرا هشام لطرحك الموضوع

بالنسبة للمشاكل بقى لازم نعرضها بصراحة وصدق

ولازم يكون عندنا امل ان صوتنا هايتسمع

والا كل واحد يقعد فى بيته ويقضى حياته لعب وتهريج بقى

لازم كل واحد يعرف ان له اهمية وقيمة فى المجتمع

والا هو لو مش اعتقد بكدا يبقى مين اللى هايعتقد؟

مين اللى هايعتقد ان له القدرة على التغيير؟ انه يبقى له صوت مسموع؟

وعموما اللى يحب يبقى نكرة طول حياته هو حر

انا بقى مش بحب اكون نكرة

مشكلتى فى الكلية زى ماقلت اول سنة تعامل مع المصطلحات باللغة الانجليزية

مش بنتدرب عليها كفاية

نظام جديد مش كل الدفعة تعرف عنه ولا تعرف مقروض يتطبق ازاى

وممكن اتفق مع قطر الندى فى رايها عن الساعات المكتبية

ومواعيد السكاشن

ليا راى فى حاجة بقى

الروتين

فى كل حاجة

فى المكتبة مثلا
مش تلاقى الجو اللى يشجع

لا تدخل ممكن تلاقى اللى بيتكلم بقى واللى بياكل

مش عارفة بجد ايه الحل

اكيد الغلط فى الشخص اللى داخل مثلا؟

انه مش عارف ايه هو دور المكتبة؟

ولا ان فعلا المكتبة مش مكان جذاب كفاية اللى بيدخل مش بيلاقى حاجة يعملها

غير انه يتكلم او..........ماعلينا

عامة انا اعتذر على الاطالة بس ياريت طلب صغير

كل واحد يمسك ورقة وقلم

ويكتب اللى يتمنى انه يقوله للعميد من دلوقتى

وكل لما يفتكر حاجة يضيفها

انا افتكرت حاجة

المعامل بقى غير مجهزة بالمرة

الطلبة بيبقى عددهم كبير كمان على المعمل مش بعرف اتحرك

المحاضرات والسكاشن بتكون متتابعة بدون فواصل

بنتعب جدا بنروح البيت نغرق فى النوم مش بنتشجع ان نذاكر فى البيت

لازم يبقى فيه متابعة اول باول وان الاستفادة كلها تكون فى الكلية

وحكاية الساعات المعتمدة دى هى اللى بتخلى الدكتور مثلا يعطى كم كبير فى المحاضرة

علشان يلحق يخلص

بجد ياريت طلبة اولى يتكلموا ويقولوا ايه رايهم فى النظام الجديد دا

واعتذر جدا جدا على الاطالة

تحياتى

رد: ندوه العميد......افكار وأراء اقترحات ومناقشات " الكل يدخل"الخميس أبريل 23, 2009 4:03 pm

أول حاجة احب اشكرك يا اتش على الموضوع و على اهتمامك بكل اسرة المنتدى
و تانى شئ بتفق مع let me alone فى ان لازم يكون عندنا امل و ثقه ف قدراتنا كمان

بالنسبه للمشاكل اللى بتواجهنا
أولا: عاوزة اعرف ايه اللى ليا و اللى عليا لكل بالنسبه لنظام الساعات المعتمدة و بالنسبه للجامعه و بالنسبه للدكتور اللى بيدينى المادة
ثانبا:مع المصطلحات النجليزيه اللى ف المواد و الى بجد بتكون محتاجة نعرفها و مفيش تدريب عليها
ثالثا: ف الجداول اللى مش بنعرف نغيرها و اللى بتخلينا مش قادرين ندى كل مادة حقها
رابعا:مع المعامل و العدد الكبير اللى بيخلينا مش عارفين نشتغل
خامسا:مع المكتبه اللى مش مهيأة دلوقتى الا للكلام و الاكل ,مش فى احتار للمكتبه و اهميتها و ده طبعا عيب الطالب قبل اى شئ بس عاوزين اى حل لكدة
و ده غير الكتب اللى مش بيكون ليها غير نسخه واحدة و صعب نستعيرها
اخر مشكله: بجد انا حاسه ان احنا مهما كنا بندرس بندرس قشور او بدايات و مركزين فيها اوى ,لازم ناخد اساسيات و نهتم بالجديد و التكنولوجيا اللى بتخلى العالم يتقدم بلاش نركز كتيرررر ف القديم قولو الاساسيات و و نركز ف الجديد و بعدها نبتكر
معلش طولت عليكو مشاكلى كتير شويه
بجد انا بفتخر انى من اسرة المنتدى

flower

رد: ندوه العميد......افكار وأراء اقترحات ومناقشات " الكل يدخل"الجمعة أبريل 24, 2009 10:53 am

من شهر فات عملنا استبيان كان فيه تقريبا حصر لمستوى الكليه ف لتدريب والعملى والاداء عموما
وكلنا قولنا اللى احنا شايفينه
واكيد الورق دا لأما بيروح كانه رماد او سراب ودا اللى اتوقعه
أو بقى لو الكلام وصل للعميد ولمسئولين عن وحده ضمان الجوده...واكيد عرفوا مشكلاتنا والعيب فين
يبقى فيه امل انه هيحصل تغييييييييييير ؟؟؟؟

انا متهيألى حال الكليه خلى ناس كتير سلبين ف حياتهم وعندهم لا مبالاه

رد: ندوه العميد......افكار وأراء اقترحات ومناقشات " الكل يدخل"الأحد أبريل 26, 2009 1:38 am

اسف انى جيت متاخر بس كان لظروف مش سهله
احب اشكر هشام على الموضوع وعلى مجهوداته فى حل مشاكل الطلبه
وربنا يجزيه كل خير

نعترف ان فيه مشاكل كتيره بتقابلنا فى الكليه
لكن بنحمد ربنا ان فيه امل فى حلها
وان فيه حد هيحاول يحلها
ويقرب مننا نحن الطلبه ويواجهنا
ويجب علينا عرض المشاكل كلها والا هنفضل نلوم نفسنا لاننا
تكاسلنا وضيعنا حقوقنا

وان شاء الله هنعرضها فى الندوه

واعتقد يا شيمى لو حتى فيه سوء نيه فى عقد الندوه
احنا ليس لدينا اى شىء نخسره
ويجب علينا حضور الندوه وعرض مشاكلنا

لكن يجب ان نكون واثقين من نفسنا اكتر من كده
ولازم نعترف بلغة الحوار ونحترم الناس اللى بتحاول
تجتمع معانا وتناقشنا فى مشاكلنا

وانا مستبشر خير فى هذه الندوه واتوقع
ان هيبقى فيه استفاده كبيره من الندوه
وربنا يسهل

رد: ندوه العميد......افكار وأراء اقترحات ومناقشات " الكل يدخل"الأحد أبريل 26, 2009 2:54 am

اانا اشكر هشام على الموضوع ده
وانشاء الله ده يكون فى صالح الطلبه ويقدموا كل مشاكلهم للعميد
وانشاء الله يلا قوا الحلول
وانشاء الله اكون اول الحاضرين ومعايا مشاكلى
شكـــــــــــــــــــــــرا

رد: ندوه العميد......افكار وأراء اقترحات ومناقشات " الكل يدخل"الأحد أبريل 26, 2009 7:52 pm

ان شاء الله
بكره الندوه
وان شاء الله اتمني الحضور يكون كويس
واتمني اعضاء منتدي علوم يحضروا
وان شاء الله هنقدم كل المشاكل اللي هنا وقدمتوها
واكثر كمان
بكره ان شاء الله الساعه 11
بمدرج 2
وكل اللي هيحضر هياخد هديه

ايه هتحضروا والا ايه؟؟؟؟؟؟؟؟

رد: ندوه العميد......افكار وأراء اقترحات ومناقشات " الكل يدخل"الإثنين أبريل 27, 2009 2:05 pm

انا اسفه على تاخير ردى بس انا كنت عامله حسابى ارد فى الندوه ولكن طالما هشام هيوصل ردودنا
يبقى دى مشاكلى فى الكليه

1-

المدرجات الصغيره سيئه جدا جدا والاضاءه سيئه ووقت السكشن بندور على مكان فاضى نحضر فيه بسبب النور لان السكشن من الساعه4 للساعه7

2-

الشؤون مش بتفيدنا بحاجه خال

حتى الندوه اللى المفروض كان النهارده محدش يعرف عنها حاجه
انا عرفت من هنا من المنتدى وفعلا حضرت انا واصحابى ولكن
مكنش فى طلبه لان محدش يعرف حاجه عن الندوه اصلا
و الاداره غير مهتمين باخبار الطلبه
3-

الطالب اخر من يعلم بامور الكليه كاننا مش من الكليه اصلا رحلات ندوات انجازات اى حاجه لانعلم عنها شىء وحتى اتحاد الطلبه مش عرفينه اللى المفروض يساعدونا ويبلغوا ارائنا ويبقوا حلقه الوصل اللى بيننا منعرفهمش اصلا

4-

فى معامل سيئه جدا ومش تشجع على الشغل فيها ولكن تشجع على الملل والاحباط

5-

المكتبه لغايه دلوقتى مش عارفه استعير كتاب
6-

اجهزه الكمبيوتر فى المكتبه بعضها مش شغال او بيعلق وخلافه
7-

ياريت السنين الجايه الجداول تبقى متظبطه اكتر من كده لان كان عندنا ايام مليانه محاضرات وسكاشن ومعامل وارهاق

وفى ايام تانيه فيها محاضره واحده او سكشن واحد وهكذا ياريت العبء يتوزع بالتساوى

وبيبقى كمان الفترات بين المحاضرات صغيره لان كل دكتور بيخرج فى نهايه المحاضره بالظبط والتنى بيدخل وراه على طول

8-

المدرجات اللى فيها data show
مفيهاش ستاير ولو فيها بتبقى مش كفايه بحيث اننا نقدر نقرا اللى مكتوب

انا اسفه على التطويل وارجو الاستجابه على مطالبنا من اداره الكليه

رد: ندوه العميد......افكار وأراء اقترحات ومناقشات " الكل يدخل"الخميس أبريل 30, 2009 1:31 pm

الا هي ايه اخبار الندوة ؟

رد: ندوه العميد......افكار وأراء اقترحات ومناقشات " الكل يدخل"الجمعة مايو 01, 2009 10:02 pm

تم الغاء الندوه لعدم حضور طلبه
وشكرا يا شيمي علي اهتمامك
الحضور كان مشرفين المنتدي بس
بعتنا شخص للمدرج ولعدم توافق طلبه تم الغائها
مش اكثر

رد: ندوه العميد......افكار وأراء اقترحات ومناقشات " الكل يدخل"الجمعة يونيو 12, 2009 3:05 pm

السلام عليكم
شكرا علي الإفادة والاهتمام

اهلا بك يا زائر لديك 16777214 مساهمة

ندوه العميد......افكار وأراء اقترحات ومناقشات " الكل يدخل"

هتحضر الندوه وتعرض مشكلتك؟؟